Festıváldiń mańyzdylyǵy – tájirıbe almasý, kásibı qasıet-qarymyn shyńdaý.
25-26 qyrkúıek kúnderi Jambyl atyndaǵy Qazaq memlekettik fılarmonıasynda alǵash ret halyqaralyq «Dırıjerler sherýi» mýzyka festıvali ótedi, dep habarlaıdy Almaty-akshamy.kz Egemen.kz silteme jasap.
Festıvál aıasynda Qazaqstan Respýblıkasynyń Memlekettik úrmeli aspaptar orkestri (QR MÚAO) óziniń 33-shi konserttik maýsymyn ashady. Kórkemdik jetekshisi jáne bas dırıjeri - QR Eńbek sińirgen qaıratkeri Qanat Ahmetov, dırıjer - Qazaqstannyń Eńbek sińirgen qaıratkeri, «Qurmet» ordeniniń ıegeri Aleksandr Belákov.
Alys-jaqyn shetelden keletin 10 dırıjer qazaqstandyq kórermen aldynda óz ónerlerin pash etpek. Estonıadan Margýs Kasemaa, Latvıadan Spodrıs Kachans, Reseıden Vıktor Hýdoleı, (Polshadan Darıýsh Adam Ledjıon, Izraılden Samýel Hagın, Gresıadan Nıkolas Hrıschohoý, Slovenıadan Mıro Saıe, Ózbekstannan Tımýr Mırzaev, Qazaqstannan Qanat Ahmetov pen Aleksandr Belákov qatysady. Festıvál sharttaryna sáıkes, olardyń árqaısysy óz eliniń úzdik týyndylaryn usynady. Atap aıtqanda, baǵdarlamaǵa sáıkes, E.Tammnyń «Eston rapsodıasy», R.Kýlldyń «Týlák», R. Paýlstyń «Melodıa», V. Kılárdyń «Reseı dalasy», «Pan Tadeýsh» fılminen «Polonez», N.Shemerdiń «Altyn Ierýsalım», N.Skalkotastyń «Grek bıleri», E. Jıvaevtyń aranjırovkasyndaǵy «Batyr Zakırovtyń ánderi», Á.Bestibaevtyń «Toıbastar» , «Azıa daýysy» shyǵarmalary oryndalady.
Festıváldiń mańyzdylyǵy – tájirıbe almasý, kásibı qasıet-qarymyn shyńdaý. Aldaǵy ýaqytta «Dırıjerler sherýi» festıvali dástúrli túrde ótkiziledi dep josparlanýda.
Kesh baǵdarlamasynda usynylatyn ár halyqtyń mýzykalyq ónerindegi biregeı format, shyǵarmalardyń alýan túrliligi, ózindik ereksheligi men qaıtalanbas áýeni óner súıer qaýymǵa ǵajaıyp kóńil-kúı syılaıtyny sózsiz.
Kesh Jambyl atyndaǵy Qazaq memlekettik fılarmonıasynyń Úlken zalynda saǵat 18.00-de bastalady.
1990 jyly qurylǵan Memlekettik úrmeli aspaptar orkestri qazaq kompozıtorlary shyǵarmalaryn oryndaý sheberligimen álemniń túkpir-túkpirinen kelgen tyńdarmandardyń nazaryna ilikti. Búgingi tańda orkestrde respýblıkalyq jáne halyqaralyq konkýrstardyń laýreat mýzykanttary men dıplomanttary jumys isteıdi. Orkestr repertýarynda 200-den astam konserttik baǵdarlamalary bar. Reseı, Germanıa, AQSH, Fransıa, Anglıa, Qytaı elderiniń ataqty dırıjerleri men mýzykanttary árdaıym ujymnyń joǵary kásibıligin, minsiz ıntonasıasy men aspaptardy asqan sheberlikpen meńgerýin, orkestr músheleriniń tamasha úılesimdiligin, baı dybystalý tembrin, baı repertýaryn aıyryqsha atap ótedi. Bas dırıjer – Qazaqstannyń eńbek sińirgen qaıratkeri, profesor Qanat Ahmetov. Dırıjer – Qazaqstannyń eńbek sińirgen qaıratkeri, «Qurmet» ordeniniń ıegeri Aleksandr Belákov. Qazaqstan kompozıtorlarynyń shyǵarmalary toptastyrylǵan respýblıka tarıhyndaǵy tuńǵysh kompakt-dısk Orkestrdiń oryndaýynda jazyldy. Ujymnyń sońǵy jetistikteriniń biri – «Marshı nashıh pobed» (Reseı) Halyqaralyq onlaın-baıqaýyndaǵy bas júldesi.