Arystanǵanı Zapparov: “Jalǵan memlekettik nómirlerdi paıdalanýdyń árbir deregi muqıat tekseriletin bolady”
Almatynyń bas polıseıi jalǵan memlekettik nómirlerdi paıdalanýdyń árbir deregi muqıat tekseriletinin aıtty, dep habarlaıdy Almaty-akshamy.kz Polisia.kz-ke silteme jasap.
Almaty qalalyq Polısıa departamentiniń bastyǵy Arystanǵanı Zapparov “Qorǵaý – Qaýipti júrgizýshi” avtomattandyrylǵan júıesiniń jumysymen tanysty.
"Kúnine 800 myńnan astam kólik júretin iri shahar jaǵdaıynda bul júıe óziniń tıimdiligin kórsetti. Ol jalǵan nómirlerdi paıdalanatyn júrgizýshilerdi, jarys uıymdastyryp, agressıvti júrgizýge jol bergenderdi anyqtaýǵa, sondaı-aq, abaısyzda qaıǵyly oqıǵaǵa ákeletin, jol qozǵalysy erejelerin elemeıtin jol qozǵalysyna qatysýshylardy anyqtaýǵa baǵyttalǵan. Jalǵan nómir, ádette, beınebaqylaý júıelerin “aınalyp ótý” úshin jáne qylmys jasaǵanda qoldanylady. Bizdiń mindetimiz – mundaı derekterdiń aldyn alý jáne osy sumdyq tájirıbeni joıý. Polısıanyń aldyńǵy sheptegi bólimsheleri men aqparattyq tehnologıalar mundaı quqyq buzýshylyqtardy anyqtaýǵa barynsha jumyldyryldy", – dedi Arystanǵanı Zapparov.
Almaty polısıasy basshysynyń aıtýynsha, tek osy aıdyń basynan beri qala joldarynda kólik quralyn jalǵan memlekettik tirkeý nómirlerimen basqarýdyń 218 deregi, memlekettik tirkeý nómirlik belgisi joq kólik quralyn basqarýdyń taǵy 773 deregi anyqtalǵan. Sonymen qatar, osy aıdyń basynan beri 4 egiz kólik ustaldy.
"Sondaı-aq, jol qozǵalysy erejelerin júıeli túrde buzyp, aıyppul tóleýden jaltaryp júrgen kólikterdi ustaý jumystary júrgizilýde. Osy maqsatta iri kólemdegi ákimshilik aıyppuldary bar kólikterdiń tizimin jasadyq. Máselen, keshe I. esimdi azamattyń basqarýynda bolǵan VAZ-21114 avtokóligi ustaldy, onyń 2,4 mln teńgeden astam tólenbegen aıyppuly bar. Osy aıdyń basynan beri jalpy qaryzy 11 mıllıon teńgeden asatyn 9 kólik mamandandyrylǵan aıyppul turaǵyna ornalastyryldy", – dep tolyqtyrdy Arystanǵanı Zapparov.
“Qorǵaý – Qaýipti júrgizýshi” júıesi engizilgennen beri barlyǵy 38 824 quqyq buzýshylyq anyqtaldy, onyń ishinde jyldamdyqty shekten asyrǵan 33 126 júrgizýshi, kólikti tehnıkalyq baıqaýsyz basqarýdyń 2 349 deregi, 2 322 kólikti saqtandyrý polısinsiz júrgizý, 83-i buryn kólik quraldaryn basqarý quqyǵynan aıyrylǵan júrgizýshilerdiń rólge otyrǵan deregi. Júrgizilgen aldyn alý is-sharalarynyń nátıjesinde, 1128 avtokólik mamandandyrylǵan aıyppul turaǵyna ornalastyryldy, 485 memlekettik tirkeý nómirlik belgileri tárkilendi.