Soltústik Qazaqstan oblysyndaǵy «Qyzyl oba» biregeı arheologıa eskertkishiniń aýmaǵynan tas dáýirine tıesili artefaktiler tabyldy.
Ol - jerdegi bógetter men aryqtar túrindegi ejelgi ırrıgasıanyń izderi. Sondaı-aq, onnan astam qorym ashyldy, dep habarlaıdy Almaty-akshamy.kz Qazaqtv.com saıtyna silteme jasap.
«Eń negizgi qorymda qazba jumystaryn júrgizgen kezde, tabytpen kómilgen mazarlar anyqtaldy. Barlyǵy dástúrge saı júrgizilgen. Iaǵnı, adam basqa jerde qaıtys bolsa, ony osy jerge ákelip jerlegen degen de pikir bar. Sonymen qatar, osyndaı mazarlardyń bolýy, jerlengen adamdardyń jaı adam emes ekendigin bildiredi. Sebebi, mazar salýǵa qarapaıym baıdyń, aýqatty adamnyń da shamasy kelmeıtin. Ol kezde belgili bir ıerarhıa boldy», - deıdi tarıhı-mádenı murany qorǵaý jáne paıdalaný ortalyǵynyń dırektory Raqat Mambetalınov.
Arheologıalyq qazba jumystary kezinde taǵy bir jańalyq ashyldy. Ǵalymdar orta ǵasyrlyq qalashyq ornynan keıingi eneolıt dáýiriniń artefaktilerine tap bolǵan.
«Bul – tas qaıraqtar, nýkleýs synyqtary, jebe ushtary, qyrǵyshtar, plasınalar, jańqalar, qapsyrmalar, tisteýish quraldar. Bul zattarǵa qarap, osydan 8 myń jyl buryn bul jerdi adamdar mekendegeninin aıtýǵa bolady. Olar ań aýlap, teri óńdegen», - deıdi QR Ulttyq mýzeıiniń ǵylymı qyzmetkeri Sáýle Rahymjanova.
Kelesi jyly qazba jumystaryna Ulybrıtanıa eliniń arheologtary qosylady. Al, otandyq ǵalymdar tarıhı eskertkishti IýNESKO-nyń tarıhı-mádenı muralar tizimine engizý úshin qujattar jınamaq.