Cotqa deıingi tergeý bastaldy.
Almatyda jappaı tártipsizdik kezinde ydys-aıaq dúkenin tonaǵan er adam ustaldy, dep habarlaıdy Almaty-akshamy.kz.
İshki ister mınıstrliginiń resmı saıtyndaǵy derek boıynsha, búlikshini ustaý kezinde polısıa qyzmetkerleri tabalar, sháınekter, pisirme tabaqtar, pyshaqtar jáne basqa da as úı ydystaryn tárkiledi.
«Jappaı tártipsizdikter kezinde tótenshe jaǵdaıdy paıdalana otyryp, A. esimdi azamat saýda ortalyqtarynyń birinde ornalasqan ydys-aıaq satatyn býtıkten jalpy quny bes mıllıon teńge bolatyn as úı ydystaryn alyp ketken. 32 jastaǵy azamat qylmysyn moıyndady. Ol sondaǵy birneshe beınebaqylaý kamerasyna jáne kýágerlerdiń smartfonyna túsip qalǵan», – dedi Bostandyq aýdandyq polısıa basqarmasy janyndaǵy polısıa bóliminiń bastyǵy Ǵalym Qasymbaev.
Atalǵan derek boıynsha sotqa deıingi tergeý bastaldy. Kúdiktiniń áreketteri QR QK-niń 188-baby 3- bóliginiń 3-tarmaǵymen (Urlyq) saralanady.
«Kúdikti urlanǵan zattardy sata almaǵan. Jedel ýákilder urlanǵan as úı ydystaryn tárkilep, aıǵaq retinde qylmystyq is materıaldaryna tirkedi. Almaty qalasynyń mamandandyrylǵan aýdanaralyq tergeý soty «qamaýǵa alý» túrindegi bultartpaý sharasyn sanksıalady»,- dedi Ǵalym Qasymbaev.