Bul týraly Óńirlik komýnıkasıalar qyzmetiniń brıfıńinde Almatynyń bilim basqarmasynyń basshysy Lázzat Jylqybaeva aıtty. Sanıtarlyq talaptardyń saqtalýyna erekshe nazar aýdarylatyn bolady, dep habarlaıdy almaty-akshamy.kz
Lázzat Jylqybaevanyń aıtýynsha, Almatyda 278 jalpy bilim beretin mektep bar, onyń 207-si memlekettik, 71-i jekemenshik. Taǵy 8 jekemenshik mektep 1 qyrkúıekte ashylatyn bolady.
«Shamamen qala mektepterinde 1-den 11-synypqa deıin 280 myńnan astam bala oqıdy. Búginde 30 myńǵa jýyq bala birinshi synypqa barady», - dedi Lázzat Jylqybaeva.
Bilim basqarmasynyń basshysy mektepterde belsendi daıyndyq júrip jatqanyn, densaýlyǵyna baılanysty emdelip júrgenderdi qospaǵanda, memlekettik bilim berý uıymdarynyń qyzmetkerleriniń 100% ekpe alǵanyn atap ótti.
«Biz balalardyń oflaın rejıminde oqýyn qamtamasyz etý úshin bar kúshimizdi salyp jatyrmyz, óıtkeni muǵalimder men oqýshylar arasyndaǵy tikeleı qarym-qatynasty eshteńe almastyra almaıdy. Búginde barlyq bilim berý uıymdary Ashyq jobasynyń qatysýshylary bolyp tabylady jáne qajetti mólsherde dezınfeksıalaýshy jáne antıseptıkalyq zattarmen qamtamasyz etilgen», - dep qosty Lázzat Jylqybaeva.
Dástúrli oqytý formatyna kóshý qatań sanıtarlyq-epıdemıologıalyq talaptardy saqtaı otyryp júzege asyrylatyn bolady.
«Mektepterde temperatýrany ólsheý, vızýaldy tekserý, jeldetý, kvars, tazalaý, ishki rejım, esik tutqalaryn antıseptıkpen óńdeý, dárethanany jıi jýyp turý ár 2-3 saǵat saıyn júrgiziledi», - deıdi bilim basqarmasynyń basshysy.
Sonymen qatar, bastaýysh, orta jáne joǵary synyp oqýshylarynyń mektepke bólek (balalar áleýmettik qashyqtyqty saqtaý úshin mektepke ár túrli kireberisten jiberiledi) kirýi qarastyrylǵan.
Lázzat Jylqybaeva Almatyda oqýshylardyń mektep formasyna qoıylatyn talaptar saqtalǵanyn basa aıtty. Sonymen birge klasıkalyq stıldegi yńǵaıly kıimmen mektepke barýǵa ruqsat etiledi.
Aıta keterligi, bıyl Bilim kúni mektep aýmaǵynda lıneıka formatynda ashyq aspan astynda barlyq mektepterdiń 1 synyp oqýshylaryna arnalǵan Álippe/Býkvar tapsyrýymen ótedi.
2-11 synyp oqýshylary úshin bekitilgen aýdıtorıalarda synyp saǵaty ótedi.