Búgingi tańda Almaty qalasynyń ákimdigi 144 qalalyq jáne 34 qala mańyndaǵy marshrýttardy uıymdastyrdy. Atalmysh baǵyttarda 2326 jyljymaly quram bar. Jyl basynan beri halyq sanynyń ósýine baılanysty 22 jańa baǵyt uıymdastyrylyp, 23 marshrýtta jyljymaly quram jańartyldy. Bul týraly Almaty ákimi Erbolat Dosaev OKQ brıfıńi barysynda BAQ ókilderiniń suraqtaryna oraı bergen jaýabynda aıtty.
Sondaı-aq, qala basshysy Memleket basshysynyń 2025 jylǵa deıin qoǵamdyq kólikti ekologıalyq otynǵa kóshirý jónindegi tapsyrmasyn oryndaý aıasynda Almaty ákimdigi men jeke tasymaldaýshylar gazben jáne elektrmen júretin avtobýstardy belsendi túrde satyp alý jumystary júrip jatqanyn baıandady.
Máselen, 2023 jyly búdjet qarajaty esebinen komýnaldyq avtopark úshin 600 gazben júretin avtobýs satyp alyndy. Búginde 430 avtobýs keldi. Oǵan 60 mlrd teńge jumsaldy. Onyń kóp bóligi qalaǵa jeltoqsan aıynyń basynda ákelindi. Qalǵan 170-i aǵymdaǵy jyldyń sońyna deıin jetkiziledi.
Brıfıń barysynda jýrnalısiń №32 baǵytqa qatysty suraǵyna Almaty ákimi atalmysh baǵyt boıynsha qazir jelide 15 avtobýs jolaýshy tasymaldaıtynyn aıtty. Al 27 jeltoqsannan bastap qosymsha avtobýstar, ıaǵnı 25 avtobýs 7-8 mınýt aralyqpen jelige shyǵatyn bolady.
Jalpy, 2024 jyly 1000 gazben júretin avtobýs, 100 elektrobýs jáne 100 troleıbýs satyp alý josparlanýda. Osylaısha, troleıbýs parki tolyǵymen jańartylady.
«Bul baǵyttaǵy jumystar jalǵasýda. 2025 jylǵa qaraı avtobýs parkteri 100% ekologıalyq kólik túrlerine aýystyrylady. Qazir qalada 800-1000 avtobýs jetispeıdi. Eger qosymsha tabys bolsa, jańa avtobýstar satyp alamyz. Osylaısha biz jolaýshylar tasymaly qyzmetiniń sapasyn jaqsartqymyz keledi. Jyldam jetkizetin qoǵamdyq kólik orta merzimdi perspektıvada Almaty qalasyndaǵy Kólik júıesiniń negizi bolady dep oılaımyn», - dedi Erbolat Dosaev.