Almaty qýyrshaq teatry Grýzıadaǵy halyqaralyq festıválde jeńiske jetti.
Almaty memlekettik qýyrshaq teatry qazaq qýyrshaq óneriniń halyqaralyq deńgeıdegi joǵary mártebesin taǵy bir ret dáleldedi. Teatr Grýzıada ótken İİ Batumi International Puppet Theatre Festival halyqaralyq qýyrshaq teatrlary festıvalinde «Úzdik rejıser» nomınasıasyn jeńip aldy, dep habarlaıdy aqshamnews.kz.
Bul festıválge Italıa, Ispanıa, Brazılıa, Fransıa, Polsha, Grýzıa jáne Qazaqstannyń úzdik teatr ujymdary baq synasqan.
Festıváldi Batýmı memlekettik qýyrshaq teatry men Grýzıanyń Qýyrshaq teatrlarynyń birlestigi uıymdastyrdy. Baıqaýda 13 spektákl kórsetilip, qazylar alqasynyń sheshimimen basty marapattar Qazaqstan, Ispanıa jáne Grýzıa teatrlaryna berildi.
Almaty qýyrshaq teatry repertýaryndaǵy eń erekshe qoıylymnyń biri – aǵylshyn dramatýrgi Ýılám Shekspırdiń áıgili tragedıasy negizinde qoıylǵan «Makbet. Illúzıa» spektaklin usyndy. Eksperımentaldy túrde qoıylǵan qoıylym eresek aýdıtorıaǵa arnalǵan, ol óziniń erekshe ádisimen áser qaldyrdy. Rejıser Dına Jumabaeva, sýretshi Iýlıa Chernova jáne horeograf Anna Soı kórermenderdi adamı emosıa men ambısıalardyń kúrdeli álemine boılatatyn erekshe vızýaldy ári plasıkalyq atmosfera jasady. Spektáklde jandy akterler men qýyrshaqtar qatar oınap, qoıylymǵa aıryqsha kórkemdik áser berdi. Klasıkany batyl da zamanaýı ınterpretasıalaǵany úshin bul qoıylym «Úzdik rejıser» nomınasıasymen marapattaldy.
Baıqaý baǵdarlamasynanbólek, festıvál qatysýshylar men kórermenderge Eýropanyń jetekshi mamandarynan qýyrshaq júrgizý men akterlik sheberlik dáristerin usyndy. Batýmı qalasynyń ortalyǵynda ótken alyp qýyrshaqtardyń sherýi qala turǵyndary úshin naǵyz merekege aınaldy. Almaty qýyrshaq teatry úshin bul festıvál shyǵarmashylyq turǵydan tájirıbe almasý alańy ǵana emes, jańa jetistikterge shabyt bergen mańyzdy is-shara boldy.
Aıta keteıik, Almaty memlekettik qýyrshaq teatry 2024 jyly 2-7 shilde aralyǵynda Kanadada ótken The First International Ottawa Puppet Theatre Festival halyqaralyq qýyrshaq teatrlary festıvalinde Gran-prı jeńip alǵan bolatyn.