Almaty qalasy Tótenshe jaǵdaılar departamenti Órt sóndirý jáne apattyq-qutqarý jumystary qyzmeti jeke quramynyń shtaty bıyl ulǵaıtyldy. Bul týraly Óńirlik komýnıkasıalar qyzmetiniń brıfıńinde TJD kadr saıasaty basqarmasynyń basshysy Sáýle Shakalova málimdedi, dep habarlaıdy Almaty-akshamy.kz
Spıkerdiń aıtýynsha, shtat kestesi Qazaqstan Respýblıkasy Úkimetiniń qaýlysyna sáıkes ulǵaıtylǵan. Almatyda qatardaǵy jáne kishi basshy quramnyń, atap aıtqanda, órt sóndirýshilerdiń, júrgizýshiler men telefonısterdiń qosymsha 262 bos orny paıda boldy.
Sáýle Shakalova izdenýshilerdiń azamattyq qorǵaý júıesine qyzmetke qalaı ornalasýǵa bolatynyn aıtyp berdi. Qyzmetke orta bilimi bar, jasy 35-ten aspaǵan barlyq kámeletke tolǵan qazaqstandyqtar tura alady. Jumysqa ornalasý úshin kandıdattyń kásipkerlik qyzmetpen aınalyspaýy jáne qylmystyq jaýapkershilikke tartylmaýy mańyzdy.
«Barlyq kandıdattar densaýlyq jaǵdaıy, jeke jáne iskerlik qasıetteri, zańnamany bilýi, sondaı-aq dene shynyqtyrý daıyndyǵy boıynsha synaqtardan ótedi», - dedi TJD kadr saıasaty basqarmasynyń basshysy.
Órt sóndirý qyzmetiniń bolashaq sarbazdaryn alǵash oqytý Málik Ǵabdýllın atyndaǵy Azamattyq qorǵanys akademıasynyń oqý ortalyǵy bazasynda ótedi. Órt sóndirýshiler kúntizbe boıynsha 35 kún, júrgizýshiler 14 kún, qalǵan úmitkerler apta boıyna oqıdy. Daıyndyq kezeńinde tyńdaýshylar búdjet qarajaty esebinen tamaqpen jáne turatyn orynmen qamtamasyz etiledi, taǵylymdama kezeńindegi jalaqy shamamen 100 000 teńgeni quraıdy.
Sáýle Shakalova áıelderdiń de TJD-ne, mysaly, radıotelefonıst bolyp ornalasa alatynyn aıtty.
Spıker elimizde ofıserler kadrlaryn daıyndaıtyn joǵary oqý orny – Kókshetaý qalasynda Málik Ǵabdýllın atyndaǵy Azamattyq qorǵanys akademıasy bar ekenin aıtty. Kýrsanttardy oqytý respýblıkalyq búdjet esebinen júrgiziledi.
Kýrsanttar tegin kıim-keshekpen,tamaqpen, stıpendıamen qamtamasyz etiledi. Akademıany támamdaǵan soń, olarǵa «azamattyq qorǵanys leıtenanty» ataǵy berilip, jumysqa mindetti túrde ornalastyrylady. Kandıdattardy irikteý jyl saıyn TJD qańtar men mamyr aıynda júrgiziledi», - dep habarlady S. Shakalova.
Eger siz Azamattyq qorǵanys organdarynda qyzmet etkińiz kelse, onda TJD-niń «Órt sóndirý jáne avarıalyq-qutqarý jumystary qyzmeti» kadr saıasaty bólimine habarlasyńyz. Onyń mekenjaıy: Qonaev kóshesi, 132 nemese 261-28-92 telefon nómirine habarlasyńyz.