ÓKQ alańynda qyzylsha boıynsha epıdemıologıalyq jaǵdaıǵa arnalǵan baspasóz konferensıasy ótti. Almaty qalasy Qoǵamdyq densaýlyq saqtaý basqarmasynyń basshysy Iran Shametekov qalada vaksınalardyń sany jetkilikti baryn atap ótti.
Brıfıń barysynda aıtylǵan aqparatqa sáıkes, SK-Farmasıa arqyly qyzylshaǵa qarsy vaksınasıa júrgizý úshin KKP vaksınasynyń 128 300 dozasy satyp alyndy, jetkizý kestesi 2023 jyldyń qarasha-jeltoqsan aılaryna josparlanǵan bolatyn. Sondaı-aq, QR Úkimetiniń rezervtik qorynan 95 200 doza mólsherinde KKP vaksınasyn satyp alýǵa soma bólindi.
«2023 jylǵy 24 qarashada Densaýlyq saqtaý mınıstrliginen taratý boıynsha SK-Farmasıa arqyly 67 350 doza mólsherinde vaksınanyń birinshi partıasy keldi, 30 950 doza mólsherinde vaksınanyń ekinshi partıasy 30 qarashada keldi. Osylaısha, qalada qosymsha jappaı ımmýndaý jáne josparly vaksınasıalaý úshin KKP vaksınasynyń 103 940 dozasy bar», - dep qorytyndylady I.Shametekov.
QDSB basshysy habarlaǵandaı, qyzylshamen syrqattanýshylyqtyń odan ári taralýyn boldyrmaý úshin qazirgi ýaqytta tolyq shtattyq rejımde 78 vaksınasıa pýnkti, 92 egý brıgadasy 276 adam jumys isteıdi. Qaladaǵy barlyq egý kabınetteri kúsheıtilgen jumys rejımine, demalys jáne mereke kúnderi - saǵat 08:00-den 16:00-ge deıin jumys rejımine aýystyryldy.
Barlyq medısınalyq uıymdarda qosymsha jappaı ımmýndaýǵa jatatyn kontıngentterdiń tizimi bar - bul 6 aıdan 10 aı 29 kúnge deıingi balalar, 2 jastan 4 jas 11 aı 29 kúnge deıingi balalar, medısına qyzmetkerleri men densaýlyq saqtaý nysandarynyń qyzmetkerleri.
Basqarmanyń málimetinshe, qazirgi ýaqytta qalalyq balalar klınıkalyq juqpaly aýrýlar aýrýhanasynda qyzylshamen aýyratyn balalardy emdeýge arnalǵan 280 tósek-orny bar jeti bólimshe ashylǵan. Stasıonarlyq emdeýde 237 bala bar.
«S. Jekenov atyndaǵy qalalyq klınıkalyq juqpaly aýrýlar aýrýhanasynda 120 oryndyq tósek-oryn ornalastyrylyp, 104-inde naýqastar emdelip jatyr. Qyzylsha boıynsha epıdemıologıalyq jaǵdaı nasharlaǵan jaǵdaıda, QKJA fılıaldarynda qosymsha tósek-oryndar ornalastyrylatyn bolady. Stasıonarlyq emdelip jatqan barlyq naýqastardyń jaǵdaılary ortasha aýyr dárejede. Stasıonarlardyń reanımasıalyq bólimshelerinde qyzylshamen aýyratyn naýqastar joq», - degen I.Shametekov, qyzylsha aýrýynan ólim-jitim tirkelmegenin atap ótti.
Naýryzdan qarashaǵa deıin qala boıynsha qyzylshadan 8519 naýqas emdeldi.