QR İshki ister mınıstrligi turmystyq zorlyq-zombylyqqa qarsy kúrestiń tıimdiligin arttyrý boıynsha keshendi sharalar qabyldap jatyr.
Halyqaralyq tájirıbeni zerdeleý barysynda, otbasyndaǵy zorlyq-zombylyqtyń aldyn alýdyń tıimdi ádisteriniń biri Ontarıo polısıasynyń minez-qulyq ǵylymdary jáne taldaý Bólimi men Waypoynt psıhıkalyq densaýlyq ortalyǵynyń zertteýshileri jasaǵan “ODARA” ádistemesine sáıkes qaıtalanatyn quqyqbuzýshylyqtardyń táýekelderin baǵalaý bolyp tabylady, dep habarlaıdy Almaty-akshamy.kz Polisia.kz-ke silteme jasap.
«Bul ODARA saýalnamasy áıelderge qazirgi, burynǵy jubaıymen nemese birge turatyn adamymen qarym-qatynasynda kezdesetin qaýipter týraly keńes berý, oǵan jasalǵan shabýyl dereginiń aldyn alý úshin qaıtadan polısıaǵa habarlasý úshin paıdalanylady. Bul quraldy qoldaný agresordy sózsiz bas bostandyǵynan aıyrýǵa emes, onyń tolyq ómirge oralýyna jáne zardap shekken tarappen tatýlasýyna baǵyttalǵan. Osylaısha, nemis qoǵamynda agresor tek quqyq buzýshy retinde ǵana emes, psıhologıalyq kómekke muqtaj adam retinde de qabyldanady. Sondyqtan quqyq qorǵaý organdary ÚEU-men birlese otyryp, agresordyń ótinishi negizinde ony psıhokorreksıalaý – agresıany basqarý boıynsha 1 jyl merzimge kýrstar júrgizedi. Januıasyn saqtap qalýdy maqsat tutqan agresor óz erkimen kýrstarǵa barǵan jaǵdaıda, bul jumys tıimdi áser etetinin eskergen jón. Sondaı-aq, bul saýalnama otbasylyq janjaldyń árbir tirkelgen deregine qatysty emes, jábirlenýshilerdiń ómiri men densaýlyǵyna naqty qaýip tóngen jekelegen jaǵdaılarda ǵana qoldanylatynyn aıta ketken jón», – dedi Almaty qalalyq PD JPQB áıelderdi zorlyq-zombylyqtan qorǵaý bóliminiń aǵa ınspektory Aqbota Ábilqasymova.
Buryn habarlanǵandaı, Qazaqstanda “ODARA” jobasy 2023 jylǵy 9 aqpan kúni Astanada ótken “Áriptestik – turmystyq zorlyq-zombylyqtyń aldyn alý quraly” forýmynda tanystyryldy. Sondaı-aq bul ádistemeni pılottyq rejımde Astana, Almaty jáne Pavlodar qalalarynda engizý týraly sheshim qabyldandy.
«Quqyqbuzýshy tarapynan quqyqbuzýshylyqtyń qaıtalaný yqtımaldyǵyn baǵalaý, turmystyq zorlyq-zombylyq bolǵan jerge kelgen polısıa ınspektory qoıǵan jáne belgilegen 13 suraq boıynsha júrgiziledi. Osy suraqtardyń árqaısysy qaıtalanýdy aıtarlyqtaı jáne táýelsiz túrde boljaıdy. Árbir pýnktke 0 nemese 1 upaı qoıylady, al jalpy upaı suraqtardyń qosyndysy bolyp tabylady. Árbir oń jaýap úshin upaı beriledi. 5 nemese odan joǵary bal – zorlyq-zombylyqtyń kúsheıýinen qorǵaý úshin aralasýdy qajet etetin jaǵdaı. Almaty PD qalalyq densaýlyq saqtaý basqarmasymen birlesip, “ODARA” táýekelderin baǵalaýdy júzege asyrý boıynsha pılottyq joba aıasynda yntymaqtastyq týraly memorandým jasalǵan. Búginde qalanyń ár emhanasynda psıholog kabınetteri ashylyp, turmystyq zorlyq-zombylyq jasaǵan tulǵalarǵa psıhologıalyq-psıhıatrıalyq, medısınalyq-profılaktıkalyq kómek kórsetý jáne medısınalyq ońaltý sharalaryn ótkizý úshin erikti túrde jiberiletin bolady», – dedi Aqbota Ábilqasymova.
Osy jobanyń nátıjeleri boıynsha “ODARA” quralynyń tıimdiligi, bul qural arqyly synaqtan ótken adamdardyń otbasy-turmystyq qatynastar salasyndaǵy quqyq buzýshylyqtardyń qaıtalanýy boıynsha baǵalanatyn bolady. Otbasy-turmystyq qatynastar salasynda qaıtalanatyn quqyq buzýshylyqtardyń sanyn azaıtý, sondaı-aq olardyń jasalý sebepteri men sharttaryn anyqtaý kútilip otyr.