Almaty polısıasy kólikten shyǵatyn shýdyń deńgeıin ólsheıtin qurylǵy satyp almaqshy. Bul týraly QR İshki ister mınıstrligi Ákimshilik polısıa komıteti tóraǵasynyń orynbasary Serik Túsipov vedomstvonyń aqparat alańynda ótken onlaın brıfıńinde aıtty, dep habarlaıdy almaty-akshamy.kz QazAqparatqa silteme jasap.
«Qyrkúıek aıynan beri Almaty qalasy azamattarynyń shaǵymy boıynsha shekten tys shý qoldanatyn avtokólikterdi anyqtaý jumysy júrip jatyr. Júrgizýshilerge shýdyń deńgeıin qalaı ólsheý kerektigin barynsha túsinikti kórsetý úshin ishki ister qyzmetkerleri arnaıy mobıldi qosymshalardy qoldanyp júr. Bul jerde mobıldi qosymsha arqyly ólshengen shýdyń deńgeıi júrgizýshilerdi ákimshilik jaýapqa tartýǵa negiz bolmaıtynyn aıtý kerek. Bul qosymshalar tek túsindirý jumystary úshin qoldanylady», - degen mınıstrlik ókili bul qosymshalardyń ornyna saqshylar sertıfıkattalǵan arnaıy qurylǵyny paıdalanatyn kún de alys emes ekenin atady.
«Degenmen Almaty qalasy polısıa departamentiniń bıylǵy búdjetine avtomobıl shýynyń deńgeıin ólsheıtin sertıfıkattalǵan 10 qurylǵy alý engizilgen», - dedi Serik Túsipov.