Mamandar panasyz balalardy izdeı bastady.
Kámeletke tolmaǵandar arasyndaǵy quqyq buzýshylyqtyń aldyn alý maqsatynda qala polıseıleri arnaıy is-sharany bastady. Atalmysh shara qyrkúıektiń 13-19 aralyǵynda ótedi, dep habarlaıdy Almaty-akhsamy.kz.
İshki ister mınıstrliginiń resmı saıtyndaǵy málimet boıynsha, múddeli memlekettik organdardyń, úkimettik emes uıymdardyń, qoǵam men buqaralyq aqparat quraldary ókilderiniń qatysýymen Almaty qalasynda «Jasóspirim» jedel aldyn alý is-sharasy ótkizilýde.
«İs-sharanyń basty maqsaty – jasóspirimder arasyndaǵy quqyq buzýshylyqtyń aldyn alý, bilim berý uıymdarynyń qatysýshylary arasyndaǵy quqyq buzýshylyqtardyń jolyn kesý, kámeletke tolmaǵandardyń quqyqtaryn qorǵaý, olardyń quqyqtyq saýattylyǵyn arttyrý salasyndaǵy ákimshilik quqyq buzýshylyqtardy anyqtaý, sondaı-aq balalarǵa qatysty qylmystyq quqyq buzýshylyqtardyń aldyn alý», – dep habarlady Almaty qalasy PD jergilikti polısıa qyzmeti basqarmasynyń bastyǵy Manap Sattarov.
Esterińizge sala keteıik, buǵan deıin Almaty qalalyq polısıasynyń bastyǵy jasóspirimder arasyndaǵy qylmystyń azaıǵany týraly habarlaǵan bolatyn. Qanat Taımerdenovtyń aıtýynsha, qabyldanǵan sharalardyń nátıjesinde búginde jasóspirimder arasyndaǵy qylmystyń 22,4% tómendeýi baıqalady. Sondaı-aq kámeletke tolmaǵandarǵa qarsy jasalǵan qylmystar sany 5,6%-ǵa tómendedi.
«Kámeletke tolmaǵandar arasyndaǵy quqyq buzýshylyqtyń aldyn alý jumystary erekshe baqylaýda. Aǵymdaǵy jyldyń basynan beri 417 jasóspirim men 375 qolaısyz otbasy anyqtalyp, ishki ister organdaryna esepke alyndy. 12 qıyn jasóspirim devıantty is-áreketti balalarǵa arnalǵan arnaıy bilim berý uıymyna jiberildi. Sonymen qatar 407 kámeletke tolmaǵandar Qıyn ómirlik jaǵdaıdaǵy balalardy qoldaý ortalyǵyna ornalastyryldy. Múddeli memlekettik organdar, qoǵamnyń qatysýymen kámeletke tolmaǵandar arasynda quqyq buzýshylyqtyń aldyn alý maqsatynda jyl basynan beri 14 jalpyqalalyq jedel aldyn alý is-sharalary júrgizildi», – dep túıindedi Qanat Taımerdenov.