Mádenıet jáne sport mınıstri Asqat Oralov jelide Almaty oblysy Qarasaı aýdanynda ornalasqan Olımpıadalyq daıarlaýdyń respýblıkalyq bazasy qurylysymen tanysty.
Bul týraly ol Telegram arnasynda jazdy, dep habarlaıdy Almaty-akshamy.kz QazAqparatqa silteme jasap.
Mınıstrdiń sózinshe, barlyq halyqaralyq standartqa sáıkes keletin zamanaýı baza Prezıdent Qasym-Jomart Toqaevtyń tapsyrmasy boıynsha salynyp jatyr.
«40 ga aýmaqty alyp jatqan sporttyq bazany shaǵyn Olımpıada qalashyǵy dese de bolady. Munda bir mezette 2 300 adam olımpıadalyq sporttyń 23 túrimen: jeńil jáne aýyr atletıka, voleıbol, basketbol, gandbol, mını-fýtbol, shaıbaly hokeı, mánerlep syrǵanaý, kónkımen júgirý, kórkem jáne sporttyq gımnastıka, boks, jekpe-jek, sonyń ishinde kúrestiń barlyq túri, sý sporty túrlerimen, oq jáne sadaq atý jáne t.b. aınalysa alady. Bazada 9 jabyq sport kesheni bar: bul jeńil atletıka maneji, muz arenasy, kópfýnksıonaldy sport zaly, gımnastıka jáne aýyr atletıka zaly, 10 jolaqty 50 metrlik olımpıadalyq baseın, jekpe-jek zaly, mergenderge arnalǵan sadaq jáne oq atý alańy, 420 oryndyq qonaq úı, dopıngke qarsy zerthanasy bar medısınalyq ortalyq pen basqa da nysandar», - dep jazdy Asqat Oralov.
Baza aýmaǵynda sportpen shuǵyldanyp qana qoımaı, bilim alýǵa, bos ýaqytty paıdaly ári qyzyqty ótkizýge barlyq jaǵdaı jasalady.
«Atap aıtqanda, kitaphana, birneshe konferens zal, boýlıń, sport dúkeni men dámhanalar bolady. Joba shaǵyn jáne orta kásipti damytyp qana qoımaı, 800-ge jýyq adamdy turaqty jumyspen qamtamasyz etedi. Bolashaqta baza aýmaǵynda álem chempıonattarynyń kezeńderin, ýnıversıada, spartakıada syndy halyqaralyq jarystardy ótkizýdi josparlap otyrmyz. Ol úshin munda barlyq múmkindik qarastyrylǵan», - delingen mınıstrdiń jazbasynda.
Ol sondaı-aq keshen qurylysy 2005 jyly bastalǵanyn, alaıda ár jyldary qarjylyq jáne basqa da máselelerge baılanysty qurylys toqtap qalǵanyn málim etti.
«Jospar boıynsha qurylys jyl sońyna deıin aıaqtalýy kerek. Qazir syrtqy ınjenerlik jelilerdi tartý jáne asfált tóseý sıaqty máseleler sheshilip jatyr. Keńes qorytyndysyna saı jaýapty mekeme basshylaryna qurylysty sapaly aıaqtaý týraly tapsyrma berdim», - dep jazdy Mádenıet jáne sport mınıstri Asqat Oralov.
Eske salsaq, buǵan deıin Asqat Oralov oblystardaǵy sport nysandarynda túgendeý júrip jatqanyn, sondaı-aq bıyl 113 jańa sport nysanyn salý jumystary jalǵasatynyn aıtqan bolatyn.