Qurylys salasyndaǵy 5 jańa joba qolǵa alynbaq
Almaty oblysynda qurylys materıaldaryn óndiretin 5 jańa kásiporyn ashylady, dep habarlaıdy Almaty-akshamy.kz BAQ.KZ-ke silteme jasap.
Búgin oblys ákimi Qanat Bozymbaev «TK «Gazoblok» kompanıasy men «Almplast» JSHS basshylarymen kezdesip, yntymaqtastyq týraly memorandýmǵa qol qoıdy, dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Oblys ákimi Qanat Bozymbaev óz sózinde elimizde qurylys salasy qarqyndy damyp kele jatqanyn tilge tıek etti.
Búgingi tańda qurylys sektory el ekonomıkasynyń negizgi draıveri bolyp tabylady. Sonyń ishinde bizdiń oblysta qurylysta jańa serpin baıqalady. Qurylys materıaldaryn shyǵarýǵa ınvestısıalyq belsendilik artyp otyr. Bul óz kezeginde turǵyndardyń áleýmettik jaǵdaıyn jaqsartýǵa óz yqpal tıgizetin bolady. Búgin İle aýdany men Taldyqorǵan qalasynda jańa zaýyttar salýdy josparlap otyrǵan eki ınvestormen arnaıy kezdesip otyrmyz, - dep atap ótti Bozymbaev.
Memorandým aıasynda qurylys salasyndaǵy 5 jańa joba qolǵa alynbaq. Máselen, «TK «Gazoblok» kompanıasy İle aýdanynda 3 zaýyt, Taldyqorǵanda 1 zaýyt salýǵa nıetti. Bul kásiporyndar gazobloktar, sement panelderdiń talshyqtaryn, shyny maqtalaryn shyǵaratyn bolady. Jobalar jeti jylǵa josparlanǵan. Shamamen 26 mlrd. teńge ınvestısıa tartylyp, 240 jumys orny ashylady.
Biz shyǵaratyn qurylys materıaldary negizinen syrt elderden ákelinedi. Qysqasha aıtqanda, ımportqa táýeldi. Sondyqtan biz ishki naryqtyń suranysyn otandyq ónimdermen tolyqtyrýdy maqsat etip otyrmyz, - dedi «TK «Gazoblok» kompanıasynyń bas dırektory Maksım Kım joba jaıly qysqasha baıandap.
Al «Almplast» JSHS «Taldyqorǵan» ındýstrıaldy aımaǵynda dıametri 20-1200 mm plasık qubyrlar shyǵaratyn óndiris ornyn ashady. Joba 2022-2023 jyldary iske asyrylady. Tartylatyn ınvestısıa kólemi – 2,6 mlrd. teńge, 37 jumys orny qurylady. Jobanyń jyldyq qýaty - 16,8 myń tonna.
Bul jobalar qurylys ındýstrıasynyń damýyna jańa serpin berip, el naryǵyna otandyq qurylys materıaldaryn kóptep shyǵarýǵa úles qospaq.
Memorandýmǵa Almaty oblysynyń ákimi Qanat Bozymbaev, «TK «Gazoblok» kompanıasynyń bas dırektory Maksım Kım men «Almplast» JSHS dırektory Sabyrhan Qasymov qol qoıdy.