Almaty – Qazaqstannyń eń iri qalasy ǵana emes, mádenıet pen bilimniń de ordasy. Qalanyń árbir kóshesiniń ataýy tarıhpen, elge eńbegi sińgen tulǵalardyń esimimen tyǵyz baılanysty. Sonyń ishinde ustazdar atyna berilgen kósheler – eldiń bilimge, ǵylymǵa, aǵartýshylyqqa degen qurmetin aıqyn kórsetetin belgi.
Qazaq halqy ustazdy árqashan erekshe qadirlegen. «Alty Alashtyń balasy bas qossa, tór – muǵalimdiki» dep bes arysymyzdyń biri, áıgili aqyn Maǵjan Jumabaev atamyz aıtqandaı, ustaz esiminiń kóshe ataýyna aınalýy – bul olardyń eńbegin ulyqtaýdyń, halyq jadynda máńgi qaldyrýdyń bir joly.
Qalamyzda birqatar ustaz ben aǵartýshynyń esimi kóshelerge berilgen.
Ahmet Baıtursynuly kóshesi – 18.04.1993 jyly Almaty qalasy ákiminiń №78 sheshimimen Alash partıasy kóshbasshylarynyń biri, tuńǵysh «Álippeniń» avtory, belgili túrkitanýshy, reformator ǵalym, qazaq tili bilimi, ádebıettaný jáne qazaq tilin oqytý ádistemesi ǵylymdarynyń negizin salǵan zertteýshi, qoǵam qaıratkeri, stalındik repressıanyń qurbany Ahmet Baıtursynulynyń esimi berilgen. Burynǵy ataýlary: a)Taranshy; á)Kosmonavtar kóshesi. Kósheniń uzyndyǵy - 4450 metr.
Ybyraı Altynsarın dańǵyly – 23.10.1991 jyldan beri qazaq halqynyń tuńǵysh aǵartýshysy, uly ustaz, fólklorıst, etnograf-zertteýshi Ybyraı Altynsarınniń esimimen atalady. Áýezov aýdanynyń aýmaǵynda ornalasqan bul dańǵyldyń uzyndyǵy – 2938 shaqyrym. Burynǵy ataýy – Pravda dańǵyly.
Spandıar Kóbeev atyndaǵy kóshe – Almaty qalasy atqarý komıtetiniń 26.12.1962 jylǵy №453/26 sheshimimen qazaq jazýshysy, aǵartýshy-pedagog, Qazaq KSR-ne eńbek sińirgen ustaz Spandıar Kóbeevtiń esimi berilgen. Túrksib aýdanynda ornalasqan kósheniń burynǵy ataýy – Molodejnaıa, kósheniń uzyndyǵy - 1820 metr.
Zeınolla Qabdolov atyndaǵy kóshe – Almaty qalasy máslıhatynyń 02.08.2008 №128 sheshimi jáne Almaty qalasy ákimdiginiń 14.08.2008 №3/557 qaýlysymen kórnekti jazýshy, bilimpaz ádebıettanýshy, ustaz-ǵalym, fılologıa ǵylymdarynyń doktory, profesor, Qazaqstan Respýblıkasy Ulttyq Ǵylym akademıasynyń akademıgi, QR Halyq jazýshysy, Qazaqstan jáne Qyrǵyzstan Respýblıkalarynyń eńbek sińirgen ǵylym qaıratkeri - Zeınolla Qabdolovtyń esimi berilgen. Áýezov aýdanynda ornalasqan kósheniń uzyndyǵy -1350 metr, burynǵy ataýy - Marechek kóshesi.
Jambyl Tobaıaqov atyndaǵy kóshe – Almaty qalasy ákiminiń 21.05.1999 №452 sheshimimen qoǵam qaıratkeri ǵalym-fızık profesor, pedagog Jambyl Tobaıaqovtyń esimi berilgen. Jetisý aýdanynda ornalasqan kósheniń burynǵy ataýy - Semıpalatınsk kóshesi, uzyndyǵy - 900 metr.
Anton Makarenko kóshesi – 24.02.1954 jyly Almaty qalasy atqarý komıtetiniń №5 sheshimimen uly pedagog, jazýshy, álemdik pedagogıka tarıhynda ózindik orny bar keńes dáýirindegi pedagogıka klassıgi Anton Semenovıch Makarenkonyń esimi berildi. Jetisý aýdanynda ornalasqan kósheniń uzyndyǵy - 650 metr.
Bul ataýlar – ustazdardyń eńbegine taǵzym etýdiń, olardyń bilim salasyna qosqan úlesin ulyqtaýdyń aıǵaǵy. Ustazdar atyna berilgen kósheler – jas urpaqqa ónege. Bul dástúr arqyly qoǵam ustazdyń qadirin dáriptep, «bilim – basty qundylyq» ekenin umyttyrmaıdy. Árbir kóshe taqtaıshasynda jazylǵan esim – tarıhtan taǵylym, bolashaqqa baǵdar.