Almaty qalasy ákimdiginiń jumys toby qaladaǵy mańyzdy mádenı nysandardy aralap, qaıta qurý jumystarynyń barysymen tanysty.
Atap aıtqanda, halyq jıi baryp, taǵzym etetin, ǵuryptyq rásimder ótetin Raıymbek batyrdyń kesenesi men memorıaldyq keshenin kórip shyqty. İrgeles aýmaqta Raıymbek batyr mýzeıin, ákimshilik ǵımarat salý men búkil aýmaqty abattandyrý josparlanǵan. Qurylys bıyl mamyrda bastalyp, 2026 jyldyń mamyrynda aıaqtalmaq.
Merdigerlerdiń aıtýynsha, jeke úıler turǵyndarymen kelisý kezinde belgili bir qıyndyqtar týyndaǵan, alaıda barlyq másele sheshilip, jumys qarqyndy júrip jatyr.
«Jańa mýzeıde kelýshilerge ádet-ǵuryp rásimderine qatysý úshin barynsha qolaıly jaǵdaı jasalady», – dedi olar.
Almaty qalasy ákiminiń orynbasary Azamat Qaldybekov barlyq jumystyń belgilengen merzimde aıaqtalýy qajettigin aıtty.
Sonymen qatar, jumys toby «Alataý» dástúrli óner teatry ǵımaratynyń qaıta jańǵyrtý jumysymen tanysty. Merdiger uıym ókilderi kúrdeli jóndeý jumystary týraly aqparat berdi. Qazirgi tańda ǵımarattyń qasbeti jańartylyp, aýmaqty abattandyrý, kórermen zalyndaǵy oryndyqtar men kilemderdi aýystyrý qolǵa alynǵan. Sondaı-aq, ǵımarat qurylymdary kúsheıtilip, seısmıkalyq tózimdiligi bekıdi, jeldetý, ınjenerlik jeliler, jylý, elektrmen jabdyqtaý jáne órt qaýipsizdigi júıeleri aýystyrylady.
Buzý jumystary aıaqtalǵan, qazir ǵımaratty qaptaý men ishki árleý jumystaryna daıyndyq júrip jatyr. Júrginshiler jolyna tóseletin materıaldar, ishki qabyrǵalar men syrtqy qasbetterdi qaptaýǵa qoldanylatyn qurylys zattarynyń sapasyna erekshe mán berilip otyr.
«Jumys kestesi tolyq saqtalady», – deıdi merdiger uıym ókilderi. Teatrdyń jóndeý jumystary bıyl jyl sońyna deıin aıaqtalmaq.
Sondaı-aq, jumys sapary aıasynda delegasıa qaladaǵy Ortalyq stadıonǵa da bardy. Munda 30 qyrkúıekte «Qaırat» pen «Real» fýtbol komandalaryyń machy ótedi. Qyzmet kórsetýshi uıym ókilderi sport nysanynyń daıyndyq barysy týraly baıandady: ınjenerlik jelilerdi tekserý, jaryqtandyrý men qaýipsizdik júıelerin jańartý, sonymen qatar aýmaqty abattandyrý jumystary júrgizilip jatyr.
Ákimniń orynbasary stadıonnyń halyqaralyq talaptarǵa saı jańarýǵa tıis ekenin atady.