Soltústik Qazaqstan oblysynda "Chıstopole – Shóptikól" avtojolynda eki polıseı qyzmettik mindetin atqarý kezinde jol apatynan kóz jumdy, dep habarlaıdy Aqshamnews.kz oblystyq polısıa departamentine silteme jasap.
Vedomstvonyń málimetinshe, Chevrolet Cobalt pen Toyota Camry kólikteri soqtyǵysyp, eki júrgizýshi oqıǵa ornynda qaza tapqan. Marqumdardyń ekeýi de ishki ister organdarynyń qyzmetkerleri bolǵan.
«Apattyń mán-jaıy men sebebin anyqtaý úshin sotqa deıingi tergeý bastaldy. Polısıa departamenti qaza bolǵandardyń týystary men jaqyndaryna qaıǵyra kóńil aıtady», – delingen habarlamada.
İshki ister mınıstri Erjan Sádenov Instagram paraqshasynda marqumdardyń otbasyna kóńil aıtyp, mınıstrlik tarapynan barlyq qajetti kómek kórsetiletinin málimdedi.
«Qyzmettik mindetin atqarý barysynda jol apatynan qaza tapqan polısıa maıory Vladımır Sınısyn men polısıa aǵa leıtenanty Dáýlethan Qazyhannyń týǵan-týystaryna qaıǵyra kóńil aıtamyn. (…) Boryshyn óteý jolynda ómirin qıǵan árbir qyzmetkerdiń esimi ishki ister organdarynyń jadynda saqtalady», – dep jazdy mınıstr.