4 qyrkúıekten bastap elimizdiń barlyq kınoteatrlarynda «Dala Cinema» kınostýdıasy usynǵan áleýmettik-drama janryndaǵy Qaitadan fılmi jaryqqa shyqty.
Bul fılm kórermenge Gollıvýdtyq «ýaqyt ilmegi» (day loop) motıvin qazaqy bolmys jáne ózekti áleýmettik máselelermen sátti úılestirgen biregeı týyndy, dep habarlaıdy aqshamnews.kz.
Fılmniń oqıǵasy aýyl tóńiregindegi dambynyń jarylýyna baılanysty órbıdi. Dambydaǵy úlken syzat – búkil qazaq qoǵamyna arnalǵan sımvoldyq eskertý ispettes. Ol kez kelgen usaq-túıektiń qaýipsizdik pen jaýapkershilik turǵysynan mańyzdy ekenin jetkizedi. «Qaıtadan» týyndysy – qoǵamdy tótenshe jaǵdaılarǵa nemquraıly qaramaýǵa, eskertý sıgnaldaryna der kezinde ún qatyp, birlikpen áreket etýge shaqyrady. Bas keıipker – qala balasy Raýan. Ol UBT-dan súringen soń, ata-ananasy sabaq bolsyn dep shalǵaıdaǵy aýylǵa aparyp tastaıdy. Biraq taǵdyr ony kútpegen synaqqa salady: Raýan bir kúnniń tuzaǵyna qalady. Ár kúnniń sońynda damby qırap, apat bolady. Keıipker ýaqyt ilmeginen shyǵý úshin tek ózin ǵana emes, búkil aýyldy qutqarýy kerek ekenin túsinedi.
«Fılmniń ıdeıasy maǵan 2020 jyly keldi. Sol jyly Almaty oblysyndaǵy Kúrti aýylynda bir túsirilimde júrgenbiz. Sol aýyldyń shetinde úlken dambyny kórip, «eger jarylyp keter bolsa, aýyldyń túgi qalmaıdy ǵoı» degen oı keldi. Aqyry osy ıdeıany damyta kele, «Qaıtadannyń» senarıin jazyp shyqtyq», - deıdi fılm rejıseri jáne senarı avtory Dýman Erkimbek.
Onyń aıtýynsha, fılmde adamdardyń basyna túsken synaq, tyǵyryqtan shyǵý kezindegi áreketter, oı salatyn ıdeıa bar. Kórkem týyndyda osyndaı aıtpaı keletin apattardyń aldyn alý, oqıǵany boldyrmaý, sebebi men saldary syndy baǵyttar qamtylǵan.
«Apat aıtyp kelmeıdi. Osy fılm arqyly qandaı da bir tosyn jaǵdaı bolsa, elimizdiń árbir azamaty qalaı áreket etý keregin kórsetýge tyrystyq. Jalpaq tilmen aıtar bolsaq, bul – eseıý týraly fılm. Fılm úshin jaı ǵana dekorasıa emes, tolyqqandy aýyl turǵyzyldy. Oǵan qoıýshy sýretshilerimiz bas-aıaǵy 3 aı ýaqyt joǵaltty. Osy arqyly bizdiń mamandardyń aýqymdy ǵana emes, óte kreatıvti dekorasıalardy da jasaı alatyn dáleldedik dep oılaımyn. 300-den astam massovka, ondaǵan dron, eki úlken túsirilim toby qatysqan evakýasıa men dambynyń jarylý sahnalaryn túsirý qıynǵa soqty. Jalpy, óte masshtabty, tehnıkalyq turǵydan qıyn joba bolǵandyqtan, árbir túsirilim kúni synaqqa toly boldy. Álbette, bul jumystardy atqarý ońaı bolǵan joq. Degenmen jumys tobynyń jobaǵa degen senimi men aýyzbirshiliginiń arqasynda bárin ótkerdik. Eń bastysy – kórermenge sapaly, oı salarlyq tereń týyndy usynǵymyz keldi. Qalǵanyn halyq baǵalaıdy», - dep qorytyndylady fılmniń bas prodúseri Jalyn Tileýbergen.
Fılm Mádenıet jáne aqparat mınıstrligi men Ulttyq kınony qoldaý memlekettik ortalyǵynyń kómegimen túsirildi. Bas rólderde otandyq jas akterler Jasulan Kópbergen, Ermek Shynbolatov jáne Shuǵyla Eshenova túsken. Ekinshi planda Almat Saqatovty, Erjan Nurymbetovty jáne Áshim Ahmetovty kórýge bolady.
«Qaıtadan» – tek ýaqyt ilmeginiń sımvoly ǵana emes, óz bolashaǵy men qoǵam ıgiligi úshin kúres jolyn qaıta oılanýǵa shaqyratyn fılm.
