Qurylysqa otandyq ónim paıdalanylmaq.
Qańtar oqıǵasynda otqa oranǵan Almaty ákimdigi ǵımaratynyń tazalaý jumystary tolyq aıaqtaldy. Oǵan jalpy sany 700-ge jýyq jumysshy jumyldyrylǵan bolatyn, dep habarlaıdy Almaty-akshamy.kz Almaty.tv silteme jasap.
Tarıhı nysan qaıta jóndeýden ótse de, negizgi tarıhı kelbetin joǵaltpaıdy dep otyr mamandar. Ákimdik ǵımaratyn tazalaý qańtardyń ortasynda bastalǵan, qazir onda qurylys kezeńine daıyndyq júrip jatyr. Shatyr jabyndysynyń negizgi qańqasyn alyp tastap, qurylysshylar jaramdy-jaramsyz bólikterin anyqtaý úshin arnaıy komısıaǵa tabystamaq.
«20 qańtardan bastap jıyrma «KamAZ» qoqys shyqqan shyǵar. Kirpishter, temirler, aǵashtar bar. Endi myna kireberistiń ústin tazalap jatyrmyz», - dedi jumysshy Jumabek Esenamanov.
Qurylysy 1980 jyly bastalǵan záýlim ǵımaratta iri bes keńse zaly bolǵan. Olardyń árqaısysy tarıhı kelbetin saqtaı otyryp, ózgeshe dızaınmen árlengen edi. Eń ókinishitisi, olardyń qazir saý-tamtyǵy qalmaǵan.
Qalalyq qurylys basqarmasy ókilderi Almaty ákimdigi ǵımaratynyń syrtqy qasbeti áýelgi arhıtektýrasynan aınymaıtyndaı mármárdan qaptalady dep otyr. Al usynylǵan materıaldyń eki túrin tańdaý úshin qoǵamdyq keńeske salamyz deıdi. Taǵy bir aıta ketetini, qurylysqa otandyq ónim paıdalanylmaq. Mármár tasty Shymkent pen Batys Qazaqstannan ákelgen eken.
«Munda jobalyq jumystar 20-25 naýryzda bitedi. Sodan keıin memlekettik saraptamaǵa beremiz. Sol memlekettik saraptamanyń nátıjesin 10-15 sáýirge deıin alamyz degen senimdemiz. Aglaı plıtasy ózimizdiń Qazaqstandiki, onyń ústine, úlgi úshin Shymkenttegi Besqudyq óńirinen taǵy plıtalar aldyrdyq. Plıtalardy arnaıy júıelerge bekitýimiz kerek, sondyqtan birshama ózgerister bolady», - dedi jaıly qalalyq orta basqarmasy basshysynyń orynbasary Saılaý Baınazarov.