Premer-Mınıstr Álıhan Smaıylov quzyrly organdarǵa mektep formasy men kanselárıalyq taýarlar baǵasyn ustap turý boıynsha birqatar shuǵyl shara qabyldaýdy tapsyrdy, dep habarlaıdy Almaty-akshamy.kz Inform.kz-ke silteme jasap.
«Sanaýly kúnderden soń jańa oqý jyly bastalady. Ata-analar balalarynyń mektep formasy men aıaq kıimderin, oqý quraldaryn túgendeý qamyna kiristi. Alaıda olardyń baǵasy eń ózekti máseleniń biri bolyp otyr.
Álbette, baǵa saıasatyna álemdik logıstıkanyń qymbattaýy, shıkizat pen qyzmetterdiń quny tikeleı áser etedi. Biraq Úkimet pen ákimdikterde qazaqstandyqtar úshin qarjylyq shyǵyndardy jeńildetýge múmkindik beretin mehanızmder bar.
Bul rette, men birqatar shuǵyl sharalardy qabyldaýdy tapsyrdym», - dedi Premer-Mınıstr.
Birinshiden, mektep formasyna baǵany ustap turý úshin Indýstrıa mınıstrligi «Atameken» UKP-men jáne ákimdiktermen birlesip, Jeńil ónerkásip qaýymdastyǵynyń, iri tigin sehtary men atelelerdiń ókilderimen kelissózder júrgizedi;
Ekinshiden, Saýda mınıstrligi «Atameken» UKP-men jáne ákimdiktermen birlesip, iri saýda ortalyqtarymen jáne bazarlarmen kanselárıalyq taýarlarǵa, sómkeler men aıaq kıimderge jáne basqa da kerek-jaraqtarǵa baǵalardy ustap turý máselelerin pysyqtaıdy;
Úshinshiden, ákimdikter «Atameken» UKP-men birlesip, oblys jáne aýdan ortalyqtarynda, Nur-Sultan, Almaty, Shymkent qalalarynda tómendetilgen baǵamen mektep jármeńkelerin, sondaı-aq jyljymaly mektep avtodúkenderiniń shalǵaı aýyldarǵa shyǵýyn uıymdastyrady;
Tórtinshiden, ákimdikter turmysy tómen otbasylarǵa memlekettik organdar men bıznes-qurylymdardy ataýly kómek kórsetý úshin bekitip beretin bolady;
Besinshiden, búgingi tańda muqtaj otbasylardy qoldaý úshin qurylǵan «Jappaı oqytý» qoryna óńirlerdiń bári birdeı qarajat bólip otyrǵan joq. Sondyqtan ákimderge atalǵan jobany qajetti kólemde qarjylandyrýdy qamtamasyz etý tapsyryldy.
«Qurmetti dostar, bilimdi urpaq – bizdiń basty qundylyǵymyz, sondyqtan oqýdyń barlyq kezeńinde olarǵa qolaıly jaǵdaı jasaý, qamqorlyqqa alyp, kóńil bólý – bizdiń negizgi mindetimiz. Osyǵan baılanysty memlekettik organdar men ákimdikter men belgilep bergen baǵyttar boıynsha jumys isteýi kerek. Bul másele Úkimettiń baqylaýynda bolady.
P. S. Keshe halyq tyǵyz ornalasqan Esil aýdanyndaǵy jalpy bilim beretin mektep qurylysynyń barysymen tanystym. Oqý orny birden birneshe mektepte oryn tapshylyǵy máselesin sheshedi», dep jazdy Álıhan Smaıylov.