«Jas sarbaz» áskerı-patrıottyq qozǵalysynyń úsh tárbıelenýshisi marapattaldy.
Memleket basshysy jarıalaǵan Balalar jylyna oraılastyrylǵan is-sharalar aıasynda qorǵanys vedomstvosynyń basshysy, general-polkovnık Rýslan Jaqsylyqov «Jas sarbaz» qozǵalysynyń 2022 jyly erekshe kózge túsken tárbıelenýshilerimen kezdesti, dep habarlaıdy Almaty-akshamy.kz.
Qorǵanys mınıstri Mádenıet jáne sport mınıstrligi uıymdastyrǵan respýblıkalyq jas patrıottar forýmynyń laýreaty atanǵan «Jas sarbaz» áskerı-patrıottyq qozǵalysynyń úsh tárbıelenýshisin marapattady.
Taldyqorǵan qalasy Muhtar Aryn atyndaǵy №24 daryndy balalarǵa arnalǵan mamandandyrylǵan lıseıdiń 7 synyp oqýshysy Nurasyl Sháripov «Jas robototehnık» nomınasıasy boıynsha úzdik atandy. Almaty oblysynyń Shamalǵan kentindegi Altynsarın atyndaǵy orta mekteptiń 7 synyp oqýshysy Álı Dosman «Jas sportshy» nomınasıasyn jeńip aldy. Al Atyraý qalasyndaǵy № 3 mektep-gımnazıanyń 3 synyp oqýshysy Dinmuhammed Jańbyrbaıǵa «Jas batyr» nomınasıasy berildi.
– Jas patrıottar forýmyna qatysqan eki júzden astam kandıdatýranyń arasynan «Jas sarbaz» áskerı-patrıottyq qozǵalysynyń tárbıelenýshileri, senderdiń jeńimpaz bolǵandaryń - biz úshin úlken maqtanysh. Senderdi búgingi jeńisterińmen quttyqtaımyn! Árqashan bilimge, jańa jetistikterge umtyla berińder! Aqyldy, qaıratty ári batyl bolyp ósińder. Árdaıym ıgi de uly isterdi jasaýǵa daıyn bolyńdar. Senderdi mektepten soń bolashaq Otan qorǵaýshylar retinde, áskerı oqý oryndarynyń kýrsanttary qatarynan kóremin dep úmittenemin, – dedi Qorǵanys mınıstri Rýslan Jaqsylyqov.
General-polkovnık Rýslan Jaqsylyqov saltanatty jaǵdaıda Nurasyl Sháripov pen Álı Dosmanǵa gramotalar tabys etti. Dinmuhammed Jańbyrbaı Qorǵanys mınıstriniń qolynan «El qorǵany» vedimistik medalin aldy.
Dinmuhammed 2022 jylǵy 3 jeltoqsanda Jaıyq ózeninde oınap júrip, muz astyna túsip ketken toǵyz jáne on tórt jastaǵy eki balany qutqaryp qalǵan bolatyn. Nebary segiz jastaǵy ol qıyn sátte abdyrap qalmaı, ózin naǵyz batyr retinde kórsete bildi.