El halqynyń 20%-in 14-29 jas aralyǵyndaǵy jastar quraıdy
Qazirgi ýaqytta memlekettik jastar saıasatynda jańa tásilderdi qalyptastyrý mańyzdy jáne Almaty osy úderiste trend-meıker bolýǵa tıis. Búgin Almatyǵa jumys sapary aıasynda eriktilerimen jáne shyǵarmashyl jastarymen kezdesken Premer-Mınıstrdiń orynbasary Eraly Toǵjanov osyndaı oı aıtty, dep habarlaıdy Almaty-akshamy.kz QazAqparat-qa silteme jasap.
Vıse-premer óz sózinde el halqynyń 20%-in 14-29 jas aralyǵyndaǵy jastar quraıtynyn atap ótti. Jas qazaqstandyqtardyń jan-jaqty damýy – Úkimet úshin basym mindet ekenine toqtaldy.
«Prezıdent Qasym-Jomart Toqaev jastardyń qozǵaýshy kúsh ekenin aıtyp, onyń zor áleýetin atap ótti. Biz bul deńgeıdi joǵarylatýymyz kerek. Qazirgi ýaqytta memlekettik jastar saıasatynda jańa tásilderdi qalyptastyrý mańyzdy jáne Almaty osy úderiste trend-meıker bolýǵa tıis. Men sizderdi óz ýaqyttaryńyz ben áleýetterińizdi ádiletti, jańa Qazaqstandy qurý jolyna paıdalanýǵa shaqyramyn. Týǵan eldiń ıgiligi úshin qyzmet etýge, adal eńbekke, progresıvti bilimge jáne ozyq tájirıbege súıenýge úndeımin. Biz birge jańa Qazaqstan quramyz!» - dedi Eraly Toǵjanov.
Kezdesýde nashaqorlyqtyń aldyn alýǵa jáne esirtkiniń taralýyna qarsy kúreske baǵyttalǵan «NarkoSTOP», shet tilderin damytýǵa baǵyttalǵan «Tilder saıahaty» jobalary tyńldaldy. Vıse-premer aǵylshyn tilin oqytýǵa arnaıy oryndar usynýdy tapsyrdy. Sondaı-aq, ınklúzıvti qoǵamǵa da kóńil bólindi.
«Inklúzıvti qoǵam erekshe qajettilikteri bar jáne múmkindikteri shekteýli adamdar úshin táýelsiz ómir saltyn júrgizýge jáne áleýmettik kásipkerlikti damytý esebinen ómirdiń barlyq salalaryna, ekonomıkalyq táýelsizdikke belsendi qatysýǵa jaǵdaı jasalatyn qoǵam retinde qarastyrylýy tıis. Inklúzıvti qoǵamdy qalyptastyrý, ásirese jastar arasynda jappaı ınklúzıvti sanany qalyptastyrýǵa baılanysty kóptegen máselelerdi sheshýdiń irgetasy bolyp tabylady. Bul úshin jurtshylyqty jáne jastardy týyndaǵan problemalardy sheshýge emes, alǵysharttar men sebepter jasaýǵa belsendirek tartý qajet. Bul – salaýatty ómir saltynan bastap, bilim alý, kásip pen daǵdylardy ıgerý», - dedi vıse-premer.