Qazaqta «Kóńil kóńilden sý ishedi», deıdi ǵoı.
Velosporttan Olımpıada chempıony Aleksandr Vınokýrov short-trekten Qazaqstan ulttyq qurama komandasynyń múshesi Abzal Ájiǵalıevke velosıped syılady, dep habarlady Almaty-akshamy.kz.
Mundaı tosyn syılyq alǵanyn Abzal Ájiǵalıev áleýmettik jelidegi paraqshasynda jazǵan.
«Búgin maǵan beımálim telefon nomerinen bir kisi habarlasty. Telefondy kótersem, Aleksandr Vınokýrov eken. Shyny kerek, keshegi jazbamnan keıin bir táýlik ótpeı jatyp, telefon soqqanyna tań qaldym. Ol meniń jazbamdy oqypty. Meni qoldaıtynyn aıtyp, Beıjiń Olımpıadasyndaǵy nátıjemmen quttyqtady. Sosyn ol úıine qonaqqa shaqyryp, velosıped syılady. Men úshin bul jaı syılyq emes. Qazaqta «Kóńil kóńilden sý ishedi», deıdi ǵoı. Eń bastysy onyń kóńiline rıza boldym», – dep jazdy sportsmen.
Esterińizge sala ketsek, budan buryn halyqaralyq dárejedegi sport sheberi Abzal Ájiǵalıev ózi aınalysatyn sport salasyndaǵy az-kem kem-ketikter týraly ashyp aıtyp, Facebook paraqasynja jazba jarıalaǵan bolatyn. Onda sportsmenerge velosıped kerektigin de aıtqan bolatyn.
«Maǵan oblystyq sport basqarmasy osyǵan deıin birneshe ret «velosıpedti alyp beremiz» dep ýáde berdi. Qazir endi surasam: «tym qymbat», - deıdi. Eń bolmasa stanok alyp berýlerin suradym. Sponsorlarǵa osy ótinishimdi aıtyp kórip edim, ol da jaýapsyz qaldy. Bizde «sportty damytý kerek» dep kóp aıtady. Biraq, ana joly aıtqanymdaı, qysqy sport únemi jazǵy sporttyń tasasynda qalyp qalady. Qysqy sport eshkimge qyzyq emes. Jaǵdaı tek ózim úshin jaqsarsyn dep emes, jalpy jastar da bul sportpen aınalyssa, osy sporttyń elimizdegi bolashaǵynyń bar ekenin kórsetkim keledi», - dep hajǵan bolatyn Abzal.
Sportshy jazba qaldyrǵanyna bir táýlik ótpeı jatyp, Aleksandr Vınokýrov velosıped syılaǵanyn habarlap otyr.
«Osyndaı kezde onyń qoldaý kórsetkenine rızamyn. Qazir kóńil-kúıimdi bir aýyz sózben jetkize almaı turmyn», – dep jazdy Abzal Ájiǵalıev.