Búginde qazaq qyzdarynyń armany tek aspanda ǵana emes, ǵaryshta jalǵasyp jatyr. Kásipker, álpınıs, arman qýǵan arý Dana Qaraǵusova jýyrda ǵaryshqa týrıs retinde ushatyn alǵashqy qazaq áıeli atanbaq.
Bul – tek jeke jetistik emes, qazaq áıeliniń sheksiz múmkindiginiń dáleli.
Alataýdyń aq shyńdaryna qumarta kóz tigip ósken almatylyq Dana, bala kezinen bıikti baǵyndyrýdy armandaǵan. Kılımandjaro men Elbrýs sekildi álemniń eń bıik núktelerin baǵyndyrǵan ol, endi ǵarysh keńistigine qadam baspaq.
Bıikke órleý – ózimdi synaýdyń tásili», – deıdi ol. Bul onyń ómirlik qaǵıdasyna aınalǵan. «Adamzattyń bolashaǵy ǵaryshpen baılanysty. Jańa kókjıekterdi baǵyndyrý arqyly biz tehnologıalardy ǵana damytyp qoımaı, jeke múmkindigińizdi keńeıte túsemiz», – dep jazdy bolashaq ǵarysh týrısi Instagram-daǵy paraqshasyna.
Áleýmettik jelilerde jarıalanǵan málimetke qaraǵanda, Dana Qaraǵusova 25 jyldan astam ýaqyt boıy medıa men dıstrıbýsıa salalarynda túrli sharalardy uıymdastyrýmen aınalysqan. Máselen, bıyl áıgili Djennıfer Lopestiń Qazaqstandaǵy konsertin ótkizýge atsalysqan. 43 jastaǵy Dananyń kásippen aınalysyp júrgenine 25 jyldan asty. Qaraǵusovany First Media Group (FMG) marketıń holdıńiniń negizin qalaýshy dep ataıdy.
Osy joba aıasynda Blue Origin ǵaryshqa 75 adamdy alyp shyqty. Tarıhta qalatyn NS-36 mısıasy – New Shepard baǵdarlamasynyń 15-nshi sapary. Ǵaryshqa saıahat bar bolǵany 10-12 mınýtqa sozylady. Zymyran 100 shaqyrym bıikke kóterilip, ǵarysh bastalatyn tusqa deıin jetedi. Dana janyndaǵy 5 jolaýshymen birge jerdiń tartylys kúshinen alystap, áýede qalyqtaıdy. Olar Jerdi ǵaryshtan tamashalaıdy.
Danamen birge kásipker Djeff Elgın, ınjener Klınt Kellı III, startap negizin qalaýshy Aaron Núman, ýkraın kásipkeri Vıtalıı Ostrovskıı jáne aty-jónin jarıalamaǵan taǵy bir jolaýshy ǵaryshqa jol tartpaq.
Kompanıa sapar qunyn naqty atamaǵanymen, bir orynǵa aldyn ala tapsyrys berý úshin 150 000 AQSH dollary kóleminde depozıt tóleý qajet ekeni aıtylǵan. Al saıahattyń jalpy quny 1 mıllıon dollarǵa deıin jetýi múmkin.
Dananyń anasy – tanymal qoǵam qaıratkeri Gúljan Qaraǵusova. Ol Qazaqstanda Eńbek jáne halyqty áleýmettik qorǵaý mınıstri boldy, keıin uzaq jyldar Parlament depýtaty qyzmetin atqardy.
Al Dana – qazirgi zamanǵy kásipker áıeldiń jarqyn úlgisi. Ol Instagram paraqshasynda jeke ómiri men saıahattary týraly ashyq jazyp, oqyrmanmen erkin tildesedi. Buryn ol tanymal bloger Beıbit Álibekovpen otasqan. Ekeýiniń úsh balasy bar. Keıin otbasy tarap ketken. Beıbit Álibekov osydan biraz buryn ǵana áleýmettik jelide: «Meniń burynǵy áıelim 8 qazan kúni ǵaryshqa ushady. Dana Qazaqstannyń tuńǵysh ǵarysh týrısi bolady. Oǵan sáttilik tileıik», – dep jazdy.
Qarapaıym qazaq qyzy endi ǵaryshqa attanǵaly otyr. Bul – tek Dana Qaraǵusovanyń emes, barsha qazaq áıeliniń armanyn júzege asyratyn tarıhı sát.
Sonymen, Dananyń ǵaryshqa sapary Batys Tehastaǵy nómiri birinshi ǵarysh aılaǵynan erteń, Astana ýaqytymen saǵat 18.00-de júzege asady.