Azamattyq qoǵam qurý jolyndaǵy qarymdy da aryndy qadam dep bilemin.
Qazaqstannyń Aqparat jáne qoǵamdyq damý mınıstri Aıda Balaeva Qazaqstan Prezıdenti Qasym-Jomart Toqaev búgingi halyqqa arnaǵan úshinshi Joldaýynda da elimizde júrgizilip jatqan saıası jańǵyrý reformalaryn júıeli jalǵastyrýdyń mańyzdylyǵyna erekshe mán bergenin atap ótti, dep habarlaıdy Almaty-akshamy.kz.
Mınıstrdiń pikirinshe, Qazaqstan Táýelsizdigin alǵash jarıalanǵannan bastap memlekettegi ishki saıası turaqtylyq men etnosaralyq tatýlyq qaǵıdalary osy memlekettik saıasattyń basty ustanymy bolyp kelgen.
«Osynyń arqasynda egemen elimiz 30 jyldaǵy jahandyq damýda jotaly jetistikter men bederli bıikterdi turaqty baǵyndyryp keledi. Degenmen, jetistikke jetý bar da, ony sol deńgeıde ustap turý bar. Bul tek bılik pen halyq arasynda saýatty da syndarly baılanys ornata alǵan qoǵamda ǵana bul múmkin bolady. Sondyqtan da memleket áleýmetpen aradaǵy osy dıalogty saqtap qana qoımaı, ózara senim deńgeıin túsirmeı ony ary qaraı nyǵaıta jetildirý úshin únemi qajetti sharalardy qabyldap keledi. Onyń jarqyn bir mysaly – qurylǵannan beri is-áreketimen senim údesinen shyǵa bilgen Prezıdent janyndaǵy Ulttyq qoǵamdyq kelisim keńesi. Búgingi kúni bul tek konsýltatıvti Keńes resýrsy ǵana emes, mol ıntelektýaldy múmkindigi bar tıimdi ári áleýetti qurylym. Memleket Basshysynyń aldyńǵy Joldaýlarynda aıtylǵan reformalardy nátıjeli de tolyqqandy iske asýyna tyń serpin beretin kúshke aınaldy. Prezıdent búgingi halyqqa arnaǵan úshinshi Joldaýynda da elimizde júrgizilip jatqan saıası jańǵyrý reformalaryn júıeli jalǵastyrýdyń mańyzdylyǵyna erekshe mán berdi», – dep jazǵan Aıda Balaeva óz Facebook paraqshasynda.
Bul rette mınıstr Memleket basshysynyń Ulttyq Keńes minberinde kótergen bastamalary negizinde sátti iske asqan saıası reformalar paketin atap ótken.
«Qoǵamda qordalanǵan kóptegen mańyzdy qoǵamdyq-saıası jáne áleýmettik-quqyqtyq máseleler óz sheshimin tapty. Mysaly, aýdandyq deńgeılegi qalalar men aýyl ákimderin saılaý reformasy sonyń aıqyn da jarqyn dáleli bola alady. Elimizdiń 14 óńirinde qurylǵan 1 847 saılaý ýchaskelerinde ótken atalǵan saılaýda 2 297 úmitkerdiń ishinen el turǵyndary 730 jergilikti ákimdi saılap aldy. Sonyń ishinde, olardyń 627-si «Aýyl», «Aq jol», HKP, ADAL syndy saıası partıalar usynǵan úmitkerlerden tańdaldy. Munyń ózi, Memleket basshysynyń bastamasymen qolǵa alynǵan reformalardyń saıası partıalar men azamattyq qoǵam alańyndaǵy belsendilikti odan ary jandandyrýǵa tyń serpin bergenin kórsetedi», – dep oılady mınıstr.
Onyń pikirinshe, sondyqtan da Prezıdent bul baǵytta qolǵa alynǵan sharalardyń durystyǵyna kezekti ret toqtalyp, 2024 jyly turǵyndarǵa aýdan ákimderin saılaýǵa múmkindik beriletinin atap ótti.
«Munymen qatar, Memleket basshysy, jergilikti ózin-ózi basqarýdy jetildirý isinde aýyldyq jerlerdegi azamattyq bastamalarǵa qoldaý kórsetýdiń mańyzdylyǵyna nazar aýdaryp, granttyq qarjylandyrý júıesin beıimdeýdiń tıimdi tetigin ázirleýdi tapsyrdy. Sóz joq, atalǵan sharalardyń barlyǵy da saıası saýatty, demokratıalyq túsinigi pisip-jetilgen, áleýmettik belsendiligi joǵary azamattyq qoǵam qurý jolyndaǵy qarymdy da aryndy qadam dep bilemin»,– dep jazdy Aıda Balaeva.