2,5 paıyzben 5 mlrd teńge: ASHM agrarlyq jobalarǵa nesıe berý tártibin jarıalady. Nesıe 10 jyl merzimge beriledi.
Aýyl sharýashylyǵy mınıstrligi agroónerkásiptik keshen salasyndaǵy jobalarǵa nesıe berý qaǵıdasyn ázirlep,ony jarıa talqyǵa usyndy. Erejede jergilikti atqarýshy organdar arqyly nesıe agroónerkásip jobalaryna qandaı sharttarmen beriletini jazylǵan, dep habarlaıdy Almaty-akshamy.kz. informburo.kz-ke silteme jasap.
Nesıeniń negizgi sharttary:
- merzimi – 10 jylǵa deıin;
- eń joǵary somasy– 5 mlrd teńgeden aspaıdy;
- nomınaldy syıaqy mólsherlemesi – jyldyq 2,5 paıyzdan aspaıdy.
Nesıe qarajatyna agroónerkásiptik keshen salasyndaǵy jańa jobalardy bastaý men buryn qolǵa alynǵan jobalardy damytýǵa da bolady. Mundaı jobalarǵa kelesiler jatady:
- taýarly sút fermasy (qýaty 400 bas maldan bastap);
- et baǵytyndaǵy qus fabrıkasy (jylyna 5000 tonna qus etinen bastap);
- kókónis saqtaý qoımasy (1000 tonnadan bastap);
- qazirgi zamanǵy sý únemdeý tehnologıalaryn (shashyratyp, tamshylatyp sýarý) paıdalana otyryp, sýarmaly eginshilik (kartop pen kókónister, jemshóp óndirisi).
Nesıe alý úshin kepil bolýy mindetti jáne negizgi borysh pen syıaqyny óteý boıynsha jeńildikti kezeń nesıe berý merzimi uzaqtyǵynyń úshten birinen aspaıdy.
Sondaı-aq, atalǵan nesıe túrin alýǵa úmitkerler kelesi talaptarǵa saı bolýy tıis:
- áleýmettik mańyzy bar azyq-túlik taýarlarynyń ımportty almastyrýyn eskere otyryp, salalyq oryndylyǵy;
- óńir turǵyndaryn sapaly jáne qoljetimdi azyq-túlikpen qamtamasyz etý;
- ýaqytsha jáne turaqty jumys oryndaryn qurý;
- aýyl halqynyń tabysyn arttyrý sheńberinde jobalarmen yntymaqtastyq jáne kooperasıa;
- aýyl sharýashylyǵy ónimin óndirý jáne qaıta óńdeý salasynda keminde 5 jyl jumys tájirıbesiniń bolýy;
- kredıttik jáne lızıńtik mindettemeler boıynsha merzimi ótken bereshektiń 90 kúnnen artyq bolmaýy;
- berik azyq bazasyn qalyptastyrý, aýyl sharýashylyǵy tehnıkasy parkin materıaldyq-tehnıkalyq jaraqtandyrý úshin aýyl sharýashylyǵy alqaptarynyń bolýy.
Qujat jobasyn jarıa talqylaý merzimi – 5 shildege deıin.