Jańa mártebe erekshe jaýapkershilik júkteıdi. 8 maýsymnan bastap Qonaev resmı túrde oblys ortalyǵy mártebesin alady dep habarlaıdy Almaty-akshamy.kz 24.kz-ke silteme jasap.
Qala turǵyndary bul bastama alǵash jarıalanǵan kúnnen bastap, onyń «gúldenýi men damýyna barynsha úles qosamyz» dep belsendilik tanytyp otyr. Memlekettik rámizderdiń 30 jyldyǵy Qonaev qalasynda birden birneshe aýqymdy sharalarmen atap ótildi. Kók týymyz jerde ǵana emes, sý ústinde de jelbiredi. Aıtýly kúnge oraı jergilikti ónerpazdar patrıottyq ánder shyrqady. Balalar men jasóspirimder sporttyq sharalar men fleshmobqa qatysty. Kemege eni 5, uzyndyǵy 10 metr bolatyn memlekettik tý ilindi. Bul Jelkendi qaıyq sport federasıasynyń Qonaev qalasynyń turǵyndaryna rámizder kúnine arnaǵan tartýy. Janyna úlken tý tartylǵan keme Qapshaǵaı sý qoımasynyń ústimen jelkendi qaıyqtarmen birge júzip ótti. Bul sharany uıymdastyrýshylar rámizderge degen qurmetti, ony nasıhattaýdy árkim ózinen bastaý kerek, dep sanaıdy.
Natalá Nosova, Qonaev qalasynyń qurmetti azamaty:
- Bul sharany ótkizýimiz tegin emes. Bizdiń qalamyzdy, osy Qapshaǵaı sý qoımasyn Qonaev saldyrdy. Biz ol kisiniń atyna kir keltirmeı, esimin qurmetpen alyp júremiz dep aıta alamyn. Sebebi qalanyń aty da, ózi de bizdiń júregimizge ystyq. Janymyzǵa jaqyn.
Shahar 50 jyldan astam Qapshaǵaı atalyp keldi. Prezıdent Jarlyǵymen oǵan kórnekti memleket jáne qoǵam qaıratkeri Dinmuhammed Qonaevtyń esimi berilgende mundaǵy jurtshylyq qatty qýandy. Eske sala keteıik, bul eldi meken Qazaqstan kartasynda 1970 jyly paıda boldy. Onyń irgetesyn qalaǵan Qonaev bolatyn. Qazir munda jasalyp jatqan tabıǵı gaz tartý, kóshe joldary men aýlalardy jóndeý, jalpy turǵyn úı sektoryn jańǵyrtý jumystary úlken istiń basy ǵana.
Sergeı Gorúnov, qalalyq máslıhattyń depýtaty:
- Memlekettik baǵdarlama boıynsha 10 úı salynady. Sonymen qosa aldaǵy jyldary10 shaǵyn aýdan jańadan boı kóteredi. Bul shamamen 60 myń otbasy baspanaly bolady degendi bildiredi.
Qalada týrızm ındýstrıasyn damytýǵa múkindik kóp. Byltyr Qapshaǵaı sý qoımasynyń jaǵasynda 126 nysan júmys istep, ol jerde 900 myńnan asa adam deamalǵan. Al bıyl týrısik nysandar sany taǵy onǵa artty. Osy jyly munda mıllıonnan artyq demalýshy keledi degen jospar bar. Memleket basshysynyń Jarlyǵyna sáıkes, 8 maýsymnan bastap Qonaev resmı túrde Almaty oblysynyń ákimshilik ortalyǵyna aınalady. Osy kúnge rámizder kúni de tuspa-tus kelip otyr. Soǵan oraı merekelik baǵdarlama uıymdastyryldy. Ortalyq saıabaqta ótken bul shara Konaev qalasynyń turǵyndary men qonaqtaryna erekshe kóńil-kúı syılady. Merekelik baǵdarlama shyǵarmashylyq ujymdar men talanttardyń basyn qosty. Konsertpen qosa jas sportshylar men mektep oqýshylary salaýatty ómir saltyn fleshmob ótkizip nasıhattady.
Qazir Qonaevtaǵy halyq sany mańyndaǵy eki aýyldyq okrýgtiń turǵyndaryn qosqanda 62 myńnan asty. Oblys ortalyǵy mártebesine ıe bolýyna baınalysty aldaǵy ýaqytta bul kórsetkish 10 esege kóbeıedi, degen jospar bar.