Bıyldan bastap elde óńirlik IT-habtardy damytýǵa basymdyq beremiz.
Bul arqyly aqparattyq tehnologıa mamandaryn tanyp, qoldaýdy kózdep otyr Úkimet, dep habarlaıdy almaty-akshamy.kz.
Qazir túrli onlaın platformalar iske qosylyp jatyr. Bul da IT mamandardyń bilimi men biliktiligin arttyrýǵa sep.
Qazirgi 14 óńirlik habtyń qatary taǵy jeteýmen tolyǵady. Munyń mańyzy zor. Sebebi álemdik IT sala bilikti mamandar men startap ıdeıalarǵa muqtaj.
Amerıkalyq SKILLSOFT kompanıasy IT salasyndaǵy biliktilik boıynsha zertteýin aıaqtady. Saýalnamaǵa búkil álemnen 5000-ǵa tarta maman qatysqan. Olardyń qatarynda Soltústik jáne Latyn Amerıkasy, Azıa-Tynyq muhıty elderi, Eýropa, Taıaý Shyǵys jáne Afrıka ókilderi bar.
Sarapshylar IT salasynyń bolashaǵyna alańdap otyr. Óıtkeni maman joq. Zertteýge qatysqan jetekshilerdiń jartysynan kóbi «aldaǵy 1-2 jylda bul anyq baıqalady» deıdi.
Onyń ústine tehnologıa jyldam damyp jatyr. Osy oraıda respondentterdiń 43%-i qyzmetkerlerinde bul aǵysqa ilesetindeı qaýqary az ekenin moıyndaǵan.
«Ásirese jasandy ıntellekt jáne mashınaly oqytýda kemshilik kóp. Biz bolashaq jumysshylarymyzdan bilimnen góri, tájirıbe talap etemiz. Tipti ol jaıly jaqsy usynymdar bolsa, quptaımyz. Ózimiz de mamandarymyzdyń biliktiligin arttyryp otyrýǵa kóńil bólemiz. Qaıta oqytýdan ótkizýimiz múmkin. Qazirdiń ózinde kóbi tegin platformalardan onlaın bilim alyp júr», - zertteýge qatysqan, IT kompanıa basshylary.
Aqparattyq tehnologıa salasyn damytý bizdiń el úshin de mańyzdy baǵyt sanalady. Memleket basshysy 2025 jylǵa qaraı 100 myń IT mamanyn daıyndaýdy tapsyrǵan edi. Qazir Astana Hub bazasynda Tech Orda baǵdarlamasy júzege asyp jatyr. 18-45 jas aralyǵyndaǵy azamattar tegin bilim alady.
Óńirlik IT-habtar da belsendi jumys istep jatyr. Aıda Dýsova, Astana Hub óńirlik damytý ofısiniń dırektory: - Qazirgi ýaqytta Astana Hub elimizdegi 14 óńirlik IT-habqa jetekshilik etedi. Biz sonymen qatar bul İT-habtardy sıfrlyq ınfraqurylym – astanahub.com platformasyn paıdalana otyryp, damytýdy qolǵa aldyq. 2023 jyly aımaqtarda AKT salasynda 784 is-shara uıymdastyrylyp, 24 702 adam qatysty, sondaı-aq 194 startap-ıdeıa usynylyp, 7 aýqymdy forým ótkizildi. Nátıjesinde byltyr óńirlerden 100-den astam kompanıa Astana Hub qatysýshy retinde tirkelip, qazirgi tańda elimizdiń IT sektorynyń damýyna belsendi úles qosyp jatyr. Bıyl taǵy 7 qalada IT-hab ashýdy josparlap otyrmyz.
Jalpy qarqyn jaman emes. Elde IT salasyndaǵy qyzmetterge suranys artyp keledi. Byltyrǵy ósim 43%-ke jetken. Kórsetilgen qyzmetterdiń deni konsýltasıalyq jáne praktıkalyq qyzmetter, baǵdarlamalyq qamtamasyz etý, sondaı-aq memlekettik elektrondyq aqparattyq resýrstar men júıelerdi qalyptastyrý jáne damytýǵa baǵyttalǵan.
IT salasyndaǵy qyzmetterdiń basym bóligi Almaty men Astanada usynyldy. Jikter bolsaq, Almatydaǵy kórsetkish 369 mlrd teńgeden asypty. Astanada kórsetilgen qyzmetter úlesi – 292 mlrd teńge. Ózge aımaqtardiki 10%-ke da jetpeıdi.
Álbette, salaǵa qyzyǵýshylyqty arttyrý úshin jalaqynyń mardymdy bolǵany abzal. Bul da eskerilgen. Ótken jyly ortasha aılyq 815 myń teńgeden asypty. Iaǵnı, eldegi ortasha deńgeıden 2 ese kóp.
Aıtpaqshy, Almatyda 19 qańtar kúni halyqaralyq forým ótedi. Onda IT salasyndaǵy jetistikter men kemshilikter sarapqa salynbaq. Túıindesek, 2026 jyly elimizdegi IT qyzmetter eksporty 1 mlrd dollarǵa jetýi kerek. Bul – Prezıdenttiń pármeni. Júıeli jumystar nátıjesinde ǵana Qazaqstan IT memleketke aınalady. Bul – anyq.
Istochnık: https://24.kz/kz/zha-aly-tar/o-am/item/634516-7-alada-it-khab-ashylady
Qoldanylǵan materıaldarǵa mindetti túrde www.24.kz saıtyna gıpersilteme berilýi tıis