Almatydaǵy Kereı-Jánibek handar kóshesiniń boıynda "Qyzyl kitapqa" engen sıver alma aǵashtary kesilgen
Almatylyqtar Medeý aýdany Kereı-Jánibek handar kóshesi boıyndaǵy 300 túp aǵashtyń zańsyz kesilgenin aıtyp shaǵymdandy. Ákimdik ol jerdi tekserdi, dep habarlaıdy Almaty-akshamy.kz QazAqparat saıtyna silteme jasap.
Belsendilerdiń kinálilerdi jazalaý týraly qoıǵan talaby jelide jarıalandy. «Kereı-Jánibek handar kóshesi, 368 mekenjaıynda arasynda "Qyzyl kitapqa" engeni bar, 300 túp aǵash kesilgen. Aıyptylardy qylmystyq jaýapkershilikke tartýdy talap etemiz»,-dep jazdy ekobelsendi Saltanat Tashımova Facebook paraqshasynda.
Osyǵan baılanysty qalalyq jasyl ekonomıka basqarmasy aǵashtar 1,15 ga ýchaskesinde kesilgenin habarlady. Onyń 1 ga aýmaǵy nysanaly maqsatta – kempıng qurylysy úshin, taǵy 0,15 ga – jeke turǵyn úı qurylysy (JTQ) úshin kesilgen.
«Bul aýmaq kempıng salýǵa arnalǵandyqtan, jasyl ekpe erejesine sáıkes, aǵash kesýge ruqsat alý qajet, alaıda JTQ aýmaǵynda aǵash otaýǵa arnaıy ruqsat talap etilmeıdi. Jasyl ekonomıka basqarmasynyń mamandary tabıǵatty qorǵaý prokýratýrasy jáne polısıamen birlesip tekserýge shyqty, biraq, olardy kúzet ishke qaraı ótkizgen joq. Kelesi kúni basqarma men botanıkalyq baq mamandary qoǵam múshelerimen birge oqıǵa ornyna barǵan soń, 300-ge jýyq aǵashtyń zańsyz kesilgeni týraly akt jasaldy», - dep naqtylady basqarmada.
Aǵashtardyń tuqymy men túrleri áli resmı anyqtalǵan joq. Botanıkalyq baq zerthanalyq zertteý nátıjesin 3-5 kún ishinde usynady.
Aldyn ala derek boıynsha, Qazaqstannyń "Qyzyl kitabyna" engen sıvers alma aǵashtary kesilgen.