Álemdegi ózge memlekettermen terezesi teń ómir súrýge múmkindik alý – kez kelgen ulttyń uly muraty. Bıyl egemendi el bolyp, Táýelsizdik alǵanymyzǵa 30 jyl tolady. Osy rette biz Táýelsizdik atty qasterli uǵymnyń Qazaq eline bergenin tizbektep ótýdi jón sanadyq. 1986 jylǵy Keńes Odaǵynyń irgesin shaıqaltqan Jeltoqsan oqıǵasynan tup-týra bes jyldan keıin Qazaq eli óziniń Táýelsizdik týraly deklarasıasyn jarıalady. Biz Táýelsizdiktiń 30 jyldyǵynyń iri 30 serpilisin bylaısha sabaqtadyq.
1991 jyly
Qazaqstan egemendi el boldy. Elimizdiń Táýelsizdigin eń alǵash bolyp muhıttyń arǵy jaǵynda jatqan Amerıka Qurama Shtattary, ekinshi Qytaı, sodan soń Ulybrıtanıa moıyndady. Onyń artynan Mońǵolıa, Fransıa, Japonıa, Ońtústik Koreıa jáne Iran Islam memleketi moıyndady. Prezıdent Jarlyǵymen Semeı ıadrolyq polıgony jabyldy. Sonymen qatar osy jyldyń 2 qazanynda qazaqtyń tuńǵysh ǵaryshkeri, Halyq Qaharmany Toqtar Áýbákirov ǵaryshqa sapar shekti.
1992 jyly
Memlekettiń basty atrıbýttary – rámizderimizdi bekitip, dúnıejúzindegi ulttyq memleketterdi moıyndaıtyn alyp uıymnyń tórine kók baıraǵymyzdy tigip, BUU-nyń tolyq-qandy múshesi atandyq. Sonymen qatar Qazaqstan EQYU sıaqty irgeli uıymnyń quramyna endi. Dál osy kezden bastap jas memleketke transulttyq korporasıalar tarapynan qyzyǵýshylyq týyp, qazaq jerine ınvestısıa sala bastady. Táýelsizdik tańy atqannan bes aıdan keıin Qazaqstannyń derbes Qarýly Kúshteri quryldy. Osy jyly dúnıejúzi qazaqtarynyń quryltaıy Almaty qalasynda ótkizildi.
1993 jyly
Táýelsiz Qazaqstan tuńǵysh Konstıtýsıasyn jarıalady. Eń alǵashqy basty qujattyń qabyldanýy – Táýelsizdik jyldaryndaǵy eleýli oqıǵalardyń biri. Dál osy jyly ulttyq valúta – teńge qoldanysqa engizilip, Qazaq eli qarjylyq táýelsizdikke qol jetkizdi. Oralmandar úshin alǵashqy jyldyq kvota taǵaıyndalyp, atamekennen jyraqtaǵy 10 myń otbasy kóship keldi. «Qazaqstan Respýblıkasynyń memlekettik shekarasy týraly» zań qabyldandy. Dál osy jyly «Alma-Ata» ataýy «Almaty» bolyp ózgerdi. Ońtústik astanada BUU-nyń Qazaqstandaǵy ókildigi paıda boldy. Qazaqstan bıligi men amerıkalyq «Shevron» kompanıasy arasynda «ǵasyr kelisimsharty» atanǵan kelisim jasaldy. Qazaqstan memlekettigi tarıhynda ólsheýsiz orny bar qaıratker Dinmuhammed Ahmetuly Qonaev ómirden ótti. «Bolashaq» halyqaralyq stıpendıasy taǵaıyndaldy.
1994 jyly
Tuńǵysh Ata Zańnyń negizinde 1994 jyly naýryz aıynda alǵash ret zań shyǵarýshy organ – Joǵarǵy Keńeske saılaý ótkizildi. Qańtar aıynda elimizdegi joǵary oqý oryndary arasynan «ulttyq» degen mártebe V.I.Lenın atyndaǵy Qazaq polıtehnıkalyq ınstıtýtyna (qazirgi Q.Sátbaev atyndaǵy Ulttyq tehnıkalyq ýnıversıteti) berildi. Táýelsiz Qazaqstanda tuńǵysh ret Parlament saılaýy ótip, elde kóp partıalyq júıeniń damýyna jol ashty. Qazaqstan men Qytaı arasyndaǵy memlekettik shekara syzyǵy naqtylandy. 1 shildede ekinshi qazaq – Talǵat Musabaev ǵarysh kógine kóterildi. Alǵashqy valúta aıyrbastaý pýnktteri paıda boldy. Dinı qyzmet jandanyp, meshit, medreseler kóbeıe bastady.
1995 jyly
Qazaqstan qazirgi damýynyń basty kepili bolyp otyrǵan Konstıtýsıany qabyldady. Osy qujat arqyly saıası júıeniń klasıkalyq úlgisine ótip, bıliktiń úsh tarmaǵy tıisti mehanızmderi arqyly jumys isteýge múmkindik aldy. 1 naýryzda qoǵamdyq ultaralyq kelisim men turaqtylyqty nyǵaıtý maqsatynda respýblıkada Qazaqstan halqy Assambleıasy quryldy. 1995 jyl Abaı jyly bolyp jarıalandy. 15 qyrkúıekte Qazaqstan Respýblıkasynyń astanasyn Aqmola qalasyna aýystyrý jóninde Prezıdent Jarlyǵy shyqty.
1996 jyly
Táýelsizdigine bes jyl tolǵan Qazaqstan memleketti damytýdyń keshendi baǵdarlamalaryn jasap, naqty iske kirise bastaǵan bolatyn. 1996 jyly 16 jeltoqsanda sol kezdegi astanamyz Almatyda Táýelsizdik monýmenti ashyldy. Bul sımvol halyqty biriktirýge baǵyttalǵan ıdeologıa aıasynda atqarylǵan sharalardyń biri edi. 1996 jyly 3 sáýirde qazaq ultynyń ókilderi jeke qujattaryna tarıhı-halyqtyq dástúrge sáıkes óz ákesiniń aty-jónin ata-babasynyń atymen jazdyrýǵa múmkindik aldy. Qazaq eli tuńǵysh ret Olımpıada oıyndaryna qatysty. Atlantada ótken XXVI jazǵy Olımpıadalyq oıyndarda qazaqstandyq sportshylar úsh altyn, tórt kúmis, tórt qola medalǵa ıe bolyp, 197 memlekettiń arasynan 24-oryn aldy. 26 sáýirde Shanhaıda Qazaqstan, Qyrǵyzstan, Reseı, Qytaı jáne Tájikstan basshylary «Shanhaı bestigin» quryp, shekara aýmaǵynda áskerı sala boıynsha senimdi nyǵaıtý jóninde kelisim jasady.
1997 jyly
Elbasy Nursultan Nazarbaev «Qazaqstan-2030. Qazaqstandyqtardyń órkendeýi, ál-aýqaty men qaýipsizdigin jaqsartý» atty halyqqa Joldaýyn arnady. Bul strategıalyq jospardy qabyldaý – únemi dınamıka men damýǵa umtylyp otyrǵan halyqaralyq qaýymdastyq ishindegi jas memlekettiń úlken táýekelge barýy edi. Sonymen qatar halyqtyq jalpykelisim men saıası repressıa qurbandaryna arnalǵan jyl bolyp jarıalandy. 20 qarashada Prezıdenttiń Jarlyǵymen burynǵy Aqmola qalasy Qazaqstannyń astanasy bolyp jarıalandy. 10 qańtarda Qazaqstan, Qyrǵyzstan jáne Ózbekstan arasynda máńgilik dostyq týraly úshjaqty kelisimge qol qoıyldy. 24 qańtarda «Qazaqstan Respýblıkasyndaǵy tilder týraly» Zań qabyldanyp, qazaq tili tuńǵysh ret memlekettik basqarý tili bolyp bekitildi. 10 jeltoqsanda Áleýmettiń áljýaz toptaryn qorǵaý jónindegi jalpyulttyq qor quryldy.
1998 jyly
Elimizde Ulttyń tarıhy men birligi jyly bolyp jarıalandy. Osy jyly memlekettiń kómegimen ultymyzdyń tarıhyn túgendep, sanany jańǵyrtý úrdisi júrgizildi. Barlyq zańnyń qaınar kózi bolyp tabylatyn Ata Zańymyzǵa tolyqtyrýlar men ózgertýler engizilip, «Qazaqstan – 2030» strategıalyq jospary resmı túrde qoldanysqa engizildi.
15 qańtarda Qazaqstan men Eýropalyq odaq elderi arasynda seriktestik jáne yntymaqtastyq jónindegi kelisimge qol qoıyldy. 10 maýsymda Qazaqstannyń jańa astanasynyń halyqaralyq tanystyrylymy ótti. 30 maýsymda Prezıdent janynan Shetel ınvestorlarynyń keńesi quryldy. 6 shildede Qazaqstan men Reseı arasynda máńgilik dostyq jáne HHİ ǵasyrǵa arnalǵan odaqtastyq jónindegi deklarasıaǵa qol qoıyldy. 17 shildede Qazaqstan men Qyrǵyzstan arasynda memlekettik shekarany delımıtasıalaý jónindegi memorandým bekidi. 9 jeltoqsanda sybaılas jemqorlyqpen kúrestiń tuńǵysh memlekettik baǵdarlamasy – 1999-2000 jyldarǵa arnalǵan baǵdarlama qabyldandy. Jyl álemdik qarjy daǵdarysymen, jańa úkimettik komandanyń kelýimen jáne respýblıka Prezıdentiniń kezekten tys saılaýymen este qaldy.
1999 jyly
10 qańtarda Prezıdent saılaýynda qazaqstandyqtardyń 79,78% daýysyna ıe bolǵan N.Nazarbaev Memleket basshysy retinde qaıta saılandy. 25 aqpan men 4 naýryz aralyǵynda Táýelsiz Qazaqstannyń tuńǵysh halyq sanaǵy ótip, elde 14 953 100 adamnyń turatyny jáne halyqtyń 10 jyl burynǵy kórsetkishke qaraǵanda 7,7 paıyzǵa azaıǵany baıqaldy. 1 naýryzda tórt saıası partıanyń basyn qosqan «Otan» respýblıkalyq partıasy quryldy. 5 sáýirde ulttyq valútamyzdyń dollarǵa qatysty baǵamy quldyrap ketti. 7 shildede elimizdegi bas musylmandyq mekeme bolǵan Almaty ortalyq meshitiniń qurylysy aıaqtaldy. Aıta keteıik, 1999-2002 jyldary Úkimetti Qasym-Jomart Toqaev basqardy.
2000 jyly
Jetpis jyl alyp ımperıanyń quramynda júrip, ult qundylyqtaryn saqtaýda esesin jiberip alǵan jas memleket jańa ǵasyrdy mádenıetti qoldaýdan bastady. Bılik mehanızmderin jetildirý maqsatynda osy jyly Elbasy Nursultan Nazarbaev «Qazaqstan Respýblıkasynyń táýelsiz sot júıesin kúsheıtý jóninde» Jarlyq qabyldady.
16 naýryzda Qazaqstannyń syrtqy saıasatynyń jańa tujyrymdamasy bekitildi. 10 qazanda Astanada Eýrazıalyq ekonomıkalyq qaýymdastyq quryldy. 15 qyrkúıek pen 1 qazan aralyǵynda Sıdneıde ótken XXVII jazǵy olımpıadalyq oıyndarda Qazaqstan quramasy úsh altyn, tórt kúmis medal alyp, 199 eldiń ishinen 22-orynǵa kóterildi.
2001 jyly
Qazaqstan óz Táýelsizdiginiń 10 jyldyq mereıtoıyn atap ótti. Bul jyly ótken on jyldaǵy atqarylǵan jumystarǵa qorytyndy jasap, aldaǵy ýaqytqa jospar jasaldy.
27 naýryzda Kaspıı qubyr konsorsıýmyn toltyrý bastalyp, «qara altyn» eksportynyń kólemi ulǵaıdy. 22 qyrkúıekte Qazaqstanǵa Rım Papasy Ioann Pavel İİ jáne osy saltanatty kórýge álemniń 30 elinen 300 myńdaı hrıstıan keldi. Osy jyly Qazaqstanda tórt áskerı okrýg quryldy. Bul jyly kórshi memlekettermen shekarany aıqyndaý aıaqtalyp, elimizde postkeńestik memleketter arasynda tuńǵysh ret kapıtalǵa raqymshylyq jarıalandy.
2002 jyly
Damý úrdisi kezinde adam kapıtalyn joǵary baǵalaıtyn Qazaqstan 2002 jyldy jalpyulttyq densaýlyq jyly dep jarıalady. Osy jyly rýhanı ortalyǵy Túrkistan qalasynda qazaqtardyń ekinshi Búkilálemdik quryltaıy ótkizildi.
25 sáýirde Eýrazıalyq medıaforým óz jumysyn bastady. Dál osy kúni Qazaqstan Fýtbol Odaǵy Eýropalyq fýtbol qaýymdastyqtary odaǵy quramyna qabyldandy. 13 mamyrda N.Nazarbaev pen V.Pýtın Qazaqstan men Reseı arasyndaǵy mańyzdy tarıhı qujat – Kaspıı teńiziniń soltústik bóliginde shekarany ajyratý jónindegi kelisimniń hattamasyna qol qoıdy. 15 mamyrda «Eır Astana» ulttyq áýe tasymaldaýshysy Almaty – Astana baǵytyn ashty. 17 qazanda Qazaqstanǵa BUU bas hatshysy K.Annan keldi. Bul jyly elordada jańa ákimshilik ǵımarattar boı kóterdi.
2003 jyly
Naryqtyq-ekonomıkalyq júıeni basty nazarǵa alǵan Qazaqstan belgili bir dárejede jetistikterge jetkennen keıin, aldaǵy úsh jyldy «Aýyl jyly» dep jarıalady. Dinder arasyndaǵy dıalogti qalyptastyrý úshin Qazaqstan álemde birinshi bolyp álemdik jáne dástúrli dinder basshylarynyń sezin ótkizdi. 23 aqpanda Máskeýde Reseı, Belarýs, Qazaqstan jáne Ýkraına Prezıdentteri biryńǵaı ekonomıkalyq keńistik qurý jónindegi málimdemege qol qoıdy. 14 naýryzda elimiz Eýropaǵa 12 jyldyq úzilisten soń qara ýyldyryq pen balyq eksportyn jandandyrdy. 19 jeltoqsanda elimizde ólim jazasyna jarıalanǵan moratorıı óz kúshine endi. Osy jyly Qazaqstan Búkilálemdik densaýlyq saqtaý uıymyna múshe boldy jáne Reseıde Qazaqstan jyly atalyp ótti.
2004 jyly
Elbasynyń tapsyrmasymen «Mádenı mura» baǵdarlamasy qabyldandy. Úsh jylǵa josparlanǵan úlken joba qazaq mádenıetiniń ótkeni men búginin sabaqtastyrdy.
16-19 mamyrda Qazaqstan men Qytaı arasynda Atasý-Alashankoý munaı qubyryn salý týraly kelisimge qol qoıyldy. 28 mamyrda Shyǵys Qazaqstan oblysynda elimizdiń 15 mıllıonynshy turǵyny – Perızat Óskenbaeva ómirge keldi. 10 qarashada «QR «Elektrondy úkimetti» qalyptastyrýdyń memlekettik baǵdarlamasy» týraly Prezıdent Jarlyǵy shyqty. 13-29 tamyz aralyǵynda Afınyda ótken XXVIIİ Jazǵy Olımpıadalyq oıyndarda Qazaqstan quramasy bir altyn, tórt kúmis, úsh qola medal alyp, 201 eldiń arasynan 40-oryndy ıelendi. Osy jyly Prezıdenttiń «Aqorda» jańa rezıdensıasy ashyldy.
2005 jyly
Qazaqstan halqy prezıdent saılaýy naýqanyn ótkizdi. Saıası kózqarastary ártúrli úmitkerler baq synaǵan saılaýda Tuńǵysh Prezıdent 91,15% daýyspen halyqtyń senimine ıe boldy. 5 shildede Shanhaı yntymaqtastyq uıymynyń Astana samıtinde AQSH-ty Ortalyq Azıadaǵy áskerı bazalardy shyǵarýdyń merzimin naqtylaýǵa shaqyrý týraly deklarasıa qabyldandy. Aqpan aıynda turǵyn úı qurylysyn damytýdyń úsh jylǵa arnalǵan jańa memlekettik baǵdarlamasy iske asyryla bastady. Jyl Uly Jeńistiń 60 jyldyǵy uranymen ótti.
2006 jyly
Qazaqstan úshin ekonomıkalyq serpilis jyly boldy. JİÓ buryn-sońdy bolmaǵan 10,6 paıyz kórsetkishke jetse, Ulttyq qordyń aktıvteri 14 mlrd dollarǵa deıin jetti. Bul halyqtyń bolashaqqa degen senimdiligin nyǵaıta tústi. Halyqaralyq qaýipsizdikti qamtamasyz etýge bar kúsh-jigerin salyp júrgen Qazaq eli osy jyly álemdik jáne dástúrli dinder basshylarynyń ekinshi sezin shaqyrdy.
11 qańtarda QR Prezıdenti N.Nazarbaevty ulyqtaý rásimi ótip, onda elimizdiń jańa Ánurany jarıa boldy. 20 qańtarda Qazaqstan Respýblıkasynyń qos palataly Parlamentine 10 jyl toldy. 3 shildede elimizde múlikti zańdastyrý naýqany bastaldy. 3 qazanda Qazaqstan men Reseıdiń shekaralas aımaqtarynyń yntymaqtastyǵyna arnalǵan forým tuńǵysh ret elimizde, Oral qalasynda ótti.
2007 jyly
Bul jyl Qazaqstandaǵy qoǵamdyq-saıası oqıǵalarmen este qalady. Konstıtýsıaǵa ózgerister men tolyqtyrýlar engizý arqyly memleket prezıdenttik basqarýdan prezıdenttik-parlamenttik basqarý júıesine ótti. Osydan keıin Parlament ózin-ózi taratyp, jazdyń sońǵy aıynda zań shyǵarýshy organdaǵy mandattar úshin saıası partıalar proporsıonaldy saılaý júıesi arqyly baq synady. Osy jyly EQYU-nyń Syrtqy ister mınıstrleri keńesi 2010 jyly atalǵan uıymǵa Qazaqstannyń tóraǵalyq etetinin jarıa etti. 19 qańtarda «Astana» kásibı veloshabandozdar úıirmesiniń tusaýy kesildi. 1 sáýirden bastap elimizde oıyn bıznesine tyıym salyndy. 3 shildede «30 korporatıvtik kóshbasshy» jalpyulttyq baǵdarlamasy iske qosyldy.
2008 jyly
Elordanyń 10 jyldyq mereıtoıy jalpyulttyq deńgeıde atalyp ótti. Álemdegi eń jas astanalardyń biri bolyp sanalatyn elimizdiń ortalyǵynyń qalyptasýyn sheteldik meımandar Elbasy Nursultan Nazarbaevtyń eńbegi dep baǵalady. 2008 jyly Qazaqstan demografıasy úlken qarqynmen damydy. 2 sáýirde Almatyda Memleket basshysy N.Nazarbaevtyń qatysýymen Beıjiń olımpıadasy alaýynyń estafetasy ashyldy. 8-24 tamyz aralyǵynda Beıjińde ótken XXIX Jazǵy Olımpıadalyq oıyndarda Qazaqstan quramasy eki altyn, tórt kúmis, jeti qola medal alyp, 204 memlekettiń ishinen 29-oryndy ıelendi.
2009 jyly
Búkil álem qarjy daǵdarysynyń shyrmaýynda qalǵan shaqta Elbasy Nursultan Nazarbaevtyń tapsyrmasymen «Jol kartasy» baǵdarlamasy ázirlenip, Úkimet daǵdarysqa laıyqty tótep berdi. Osyndaı qıyn kezeńde qaýipsizdik pen turaqtylyqty umyt qaldyrmaǵan Qazaqstan Astana tórinde álemdik jáne dástúrli dinder basshylarynyń úshinshi sezin ótkizdi. 12 qańtarda Astanada QR tuńǵysh Prezıdentiniń alǵashqy ıntellektýaldyq mektebi ashyldy. 24-25 aqpanda halyq sanaǵy júrgizilip, onyń bir jyldan keıin jarıalanǵan qorytyndysy boıynsha el halqynyń sany 16 mıllıonnan asty. 21-23 naýryz kúnderi Naýryz merekesi tuńǵysh ret resmı túrde úsh kún qatarynan toılandy. 3 tamyzda «Jetigen-Qorǵas» halyqaralyq temirjol qurylysy bastaldy. 12 jeltoqsanda QR Prezıdenti N.Nazarbaev pen QHR Tóraǵasy Hý Szıntao «Túrikmenstan – Qazaqstan – Ózbekstan – Qytaı» gaz qubyrynyń qazaqstandyq bóligin iske qosty.
2010 jyly
Tarıh betterinde bul jyl Qazaqstannyń EQYU-ǵa tóraǵalyǵymen este qalatyny sózsiz. Halyqaralyq qaýymdastyq tarapynan Vankýverden Vladıvostokqa deıingi terıtorıada ornalasqan 56 eldiń basyn qosatyn uıymnyń jumysyna joǵary baǵa berildi. Uıymnyń 11 jyl boıy ótkizilmegen samıti elordada uıymdastyryldy. Prezıdent Joldaýy boıynsha Úkimet ındýstrıalyq-ınnovasıalyq baǵdarlama qabyldady. Bilim men ǵylymǵa erekshe nazar aýdarylyp, jańa zań maquldandy. Elimizde halyqaralyq dárejedegi tuńǵysh bilim ordasy – Nazarbaev ýnıversıteti ashyldy. BUU Semeı polıgony jabylǵan kúndi Halyqaralyq ıadrolyq qarýsyzdaný kúni dep bekitti. 1 qańtarda Qazaqstan, Reseı jáne Belarýs arasyndaǵy Kedendik odaq jumys isteı bastady. BUU Naýryz merekesin halyqaralyq halyqtyq meıram dep tanydy.
2011 jyly
30 qańtar men 6 aqpan aralyǵynda Qazaqstanda tuńǵysh ret Qysqy Azıa oıyndary ótti. Sport básekesinde elimizdiń sportshylary 32 altyn, 21 kúmis, 17 qola medaldi ıelenip, qurlyqtaǵy 26 eldiń arasynan alǵashqy oryn aldy. Aq Azıada qazaq qoǵamyna aıryqsha rýhanı serpilis syılady. 1 jeltoqsanda Almaty metropolıteni iske qosyldy. 9 jeltoqsanda Moınaq sý elektr stansysy paıdalanýǵa berildi. Jeltoqsanda Qazaqstan Respýblıkasynyń Táýelsizdigine 20 jyl toldy.
2012 jyly
Bul jylǵy Elbasy Joldaýy tek ekonomıkanyń ǵana emes, sonymen qatar, áleýmettik salanyń da órkendeýine baǵyttaldy. Halyqty jumyspen qamtý, qoljetimdi baspana, óńirlerdi damytý, memlekettik qyzmet kórsetýdiń sapasyn kóterý, basqarýshylardyń biliktiligi, sot jáne quqyq qorǵaý júıesi, adam kapıtaly, zeınet júıesi, ındýstrıaldy jobalar, aýyl sharýashylyǵyn damytýǵa erekshe den qoıyldy. Osy jyly Qazaqstan alyp qurylys alańyna aınalyp, onmyńdaǵan jumys oryndary quryldy. 22 qarashada Qazaqstan 2017 jyly elde álemdik kórme ótkizý quqyǵyna ıe boldy. Halyqaralyq kórme búrosy músheleriniń qatysýymen Astana 103 daýys jınady.
2013 jyly
Bul jyl Tuńǵysh Prezıdent jarıalaǵan «2050 Strategıasy – qalyptasqan memlekettiń jańa saıası baǵyty» atty Joldaý boıynsha jumystardyń qolǵa alynýymen erekshelendi. Sonymen qatar osy jyly Qazaqstan tarıhynda tuńǵysh ret jergilikti bılik organdary basshylarynyń saılaýy ótti. 24 tamyzynda Prezıdent Nursultan Nazarbaevtyń qatysýymen «Qazaqstan-2050» strategıasy: bir halyq – bir el – bir taǵdyr» taqyrybynda Qazaqstan halqy Assambleıasynyń XX mereıtoılyq sesıasy bolyp ótti.
2014 jyly
Osy jyldyń tamyz aıynda Úkimette qaıta qurý jumystary ótti: 17 mınıstrlik pen 9 agenttiktiń ornyna elde 12 mınıstrlik jáne shamamen 30 komıtet quryldy. Qarjy polısıasynyń qyzmeti Memlekettik qyzmet jáne jemqorlyqqa qarsy kúres isteri jónindegi agenttikke berildi. Budan ózge energetıka, mádenıet jáne sport, ınvestısıalar jáne damý, ulttyq ekonomıka mınıstrlikteri quryldy.
2015 jyly
27 shildede Qazaqstan Respýblıkasy Dúnıejúzilik saýda uıymynyń múshesi atandy. Ekinshi qyrkúıekte Qazaqstan tarıhyndaǵy úshinshi ǵaryshker – Aıdyn Aıymbetov ǵaryshqa samǵap, halyqaralyq ekıpajdyń quramynda Halyqaralyq ǵarysh stansasyna attandy. Sondaı-aq el tarıhyndaǵy Qazaq handyǵynyń 550 jyldyq mereıtoıy búkil respýblıka jáne TMD elderi arasynda atalyp ótti.
2016 jyly
16 jeltoqsanynda Qazaqstannyń óz aldyna egemendi el bolyp jarıalanǵanyna 25 jyl toldy. Táýelsizdiktiń 25 jyldyǵyna arnalǵan deklarasıa jazyldy. Sondaı-aq, osy kezde el astanasyna Memleket basshysynyń esimin berý týraly usynystar aıtyldy. Mereke qarsańynda kóptegen qazaqstandyq memlekettik marapattardy ıelenip, elde amnıstıa jarıalandy.
2017 jyly
Qazaqstanda EXPO-2017 kórmesi uıymdastyryldy. Atalǵan kórme 10 maýsym men 10 qyrkúıek aralyǵynda Astanada ótti. Ony tamashalaýǵa álemniń túkpir-túkpirinen 3 mıllıon adam keldi. Al kórmeni ótkizýge 115 memleket pen 22 halyqaralyq uıym qatysty. 26 qazanda Memleket basshysynyń qazaq tilin latyn álipbıine kóshirý týraly jarlyǵy qabyldandy.
2018 jyly
1 qańtardan bastap Qazaqstan BUU Qaýipsizdik keńesine tóraǵalyq etti. Tóraǵalyqtyń negizgi maqsaty Ortalyq Azıa men Aýǵanstan boıynsha qujat qabyldaý boldy. Keńestiń turaqty emes músheleri bul qyzmetke kezekpen kirisedi. Sondaı-aq Astananyń 20 jyldyq mereıtoıy toılandy. 12 tamyzda Aqtaýda 5-shi Kaspıı samıti ótip, oǵan teńiz jaǵalaýyndaǵy Qazaqstan, Ázerbaıjan, Iran, Reseı jáne Túrikmenstan elderiniń prezıdentteri qatysty. Dál osy alqaly jıyn barysynda 25 jyldan beri kúrmeýi kúrdeli problemaǵa aınalyp kelgen Kaspıı teńiziniń quqyqtyq mártebesi aıqyndalǵan bolatyn.
2019 jyly
Qazaqstan úshin tosyn oqıǵalarǵa toly boldy. 19 naýryzda Qazaqstannyń Tuńǵysh Prezıdenti Nursultan Nazarbaev ókilettigin toqtatty. 9 maýsymda kezekten tys saılaý ótip, 70 paıyzdan astam daýys jınaǵan Qasym-Jomart Toqaev el Prezıdenti bolyp saılandy. 2 qyrkúıekte Qazaqstan prezıdenti Qasym-Jomart Toqaev «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» degen taqyryppen halyqqa Joldaý jasady.
2020 jyly
Elimizde ál-Farabıdiń 1150 jyldyǵy, Abaı Qunanbaıulynyń 175 jyldyǵy, Altyn Ordanyń 750-jyldyǵy syndy mereıtoılar jalpyhalyqtyq deńgeıde atalyp ótti. Alaıda COVID-19 pandemıasynyń taralýyna baılanysty kóptegen josparlarǵa ózgerister engizildi. Abaı mereıtoıynyń eń jarqyn kórinisi mádenı-aǵartý baǵytyndaǵy «Abaı» telearnasy ashyldy. Bul jyl elimizdiń densaýlyq saqtaý salasy úshin úlken synaq boldy. Dárigerler koronavırýs ınfeksıasyna qarsy kúres jolynda jańa tájirıbe jınady jáne sabaq aldy. Elimizde COVID-19 qarsy kúres úshin 15 jańa modýldik juqpaly aýrýlar aýrýhanasy ashyldy. Qazaqstanda mindetti áleýmettik medısınalyq saqtandyrý júıesi iske qosyldy. Dárigerlerdiń ortasha jalaqysy 30%, orta medısına qyzmetkeriniń jalaqysy 20% ósti.
2021 jyly
Memleket basshysy Qasym-Jomart Toqaev 2021 jyldy «Táýelsizdiktiń 30 jyldyǵy» dep jarıalady. Sondaı-aq, Prezıdent 30 jyldyqqa baılanysty sharalar halyqqa rýhanı serpilis ákelýi qajet ekenin aıtty. Rýhanıat salasyndaǵy jumys birneshe baǵyttan turady. Solardyń biri – ult tarıhynda óshpes iz qaldyrǵan kórnekti tulǵalardyń eńbegin nasıhattaý. «Mereıli jylǵa birneshe ataýly data tuspa-tus kelip otyr. Jyr alyby Jambyldyń – 175, Alash arysy Álıhan Bókeıhanovtyń – 155, kúsh atasy Qajymuqannyń – 150 jyldyǵy, taǵy basqa birneshe tarıhı tulǵanyń mereıtoıy. Biz bul merekelerdi óte maǵynaly ótkizýimiz kerek», – dedi Qasym-Jomart Toqaev. Bul jyl tarıhı jáne mejeli jyl bolmaq.
Túıin:
Qoryta kelgende, 30 jyl degen tarıh úshin asa kóp ýaqyt emes. Osy jyldar ishinde elimiz basynan úsh daǵdarysty ótkergen eken. Atalǵan qıyn-qystaý kezeńder elimizdiń shydamdylyǵy men tózimdiligin qaırap, búginderi bizdiń Eýrazıalyq ekonomıkıkalyq keńistikti qurý sekildi birqatar basym batyl qadamdarmen alǵa jeteleýde.