Azyq-túlik qaýipsizdigin qamtamasyz etý maqsatynda.
2023 jyldyń 21 qańtaryna deıin elimizden tiri iri qara, qoı jáne eshki shyǵarýǵa tyıym salyndy. Bul jaıynda Májilis depýtattarynyń saýalyna QR Premer-Mınıstriniń orynbasary – Saýda jáne ıntegrasıa mınıstri Serik Jumanǵarınniń jaýabynda aıtylǵan, dep habarlaıdy Almaty-akshamy.kz QazAqparatqa silteme jasap.
«Azyq-túlik qaýipsizdigin qamtamasyz etý maqsatynda 31 is-sharany kózdeıtin 2022-2024 jyldarǵa arnalǵan azyq-túlik qaýipsizdigin qamtamasyz etý jónindegi jospar qabyldandy. Bul jospar azyq-túlik taýarlarynyń naqty jáne ekonomıkalyq qoljetimdiligin, tamaq ónimderiniń sapasy men qaýipsizdigin qamtamasyz etýge baǵyttalǵan. Jospar aıasynda 230 ınvestısıalyq jobany (2022 jyly - 80 joba, 2023 jyly – 85 joba, 2024 jyly – 65 joba) iske asyrý usynyldy. Olar 2024 jylǵa qaraı negizgi ımportqa táýeldi taýarlar (alma, balyq, shujyq ónimderi, irimshik jáne súzbe, qus eti) boıynsha el halqyn 100 paıyz qamtamasyz etýge múmkindik beredi», - dedi ol jaýabynda.
Sonymen qatar, Serik Jumanǵarınniń atap ótýinshe, 2023 jyldyń 21 qańtaryna deıin tiri iri qara, qoı jáne eshki shyǵarýǵa tyıym salyndy. 2022 jyldyń sońyna deıin qamys shıkizatyn bajsyz ákelýge kvota qoldanylady. Sondaı-aq, ákimdikter múddeli memlekettik organdarmen birlesip, áleýmettik mańyzy bar azyq-túlikke 15 paıyz saýda ústemesiniń saqtalýyna monıtorıń jáne baqylaý júrgizedi.
«Moratorııdiń qoldanylý kezeńinde tekserýler júrgizý boıynsha tıisti usynymdar ázirlendi. Máselen, ÁMAT-qa saýda ústemesin asyrǵany úshin osy jyly 259 ákimshilik hattama jasaldy. Oǵan halyqtyń shaǵymdary negiz boldy. Tekserýlerge qosymsha saýda sýbektilerimen túsindirý jumystary júrgiziledi jáne zańnamalyq normalardyń buzylýyna jol bermeý boıynsha ázirlengen jadynamalar jiberiledi», - dedi mınıstr.