Bul ashtyq pen kóp adamnyń ólimine ákeledi.
Áleýmettik jelide 2025 jyly apatty ınfeksıanyń paıda bolatyny boljandy degen aqparat tarady, dep habarlaıdy Almaty-akshamy.kz
Stopfake.kz-tiń jazýynsha, bul ótirik.
Birinshiden, avtor eshqandaı naqty aqparat kózderin atamaıdy. Biraq 2024 jyldyń qazan aıynan 2025 jyldyń qazan aıyna deıin álemde ashtyq pen jappaı ólim bolady tur dep málimdeıdi. Ol kezde «H aýrýy» taraıdy eken.
«H aýrýy» termınin Dúnıejúzilik densaýlyq saqtaý uıymy 2018 jyly engizdi. Bul múldem ınfeksıa emes. Ǵalymdar bolashaqta epıdemıaǵa ákelýi múmkin belgisiz aýrýdy osylaı ataıdy. Buǵan deıin, 2015 jyly DDSU pandemıa týdyrýy yqtımal basym qozdyrǵyshtardyń tizimin jasady. Tizim turaqty emes, ol jańartylyp otyrady. The Guardian basylymynyń habarlaýynsha, Ulybrıtanıada vaksınalardy zertteý ortalyǵy ashyldy. Onda janýarlardyń vırýstaryn zerttep, ımmýndaýdy kúsheıtý qajet aımaqtar anyqtalyp, «H aýrýyna» daıyndyq júrgiziledi. Mundaı zerthanany qurý «100 kúndik mısıa» jobasyna kiredi. Ǵalymdar 100 kúnde H aýrýyn tıimdi jeńe alatyn qaýipsiz vaksına jasaý ústinde.
Habarlama avtorlary Dúnıejúzilik ekonomıkalyq forýmdy da mysal retinde keltiredi. Bul uıym 2025 jylǵa qaraı bolatyn apatty ınfeksıany modeldegen eken. Bul týraly DEF-tiń resmı saıtynda da, áleýmettik jelilerinde de aqparat joq.
2023 jyldyń sáýirinde 2025 jyly pandemıanyń bastalýyna sebep bolatyn SEERS vırýsy jasaldy degen jalǵan aqparat tarady. AP faktchekerleri bul oqý-jattyǵýlary bolǵanyn anyqtady. Ony 2022 jyldyń qazan aıynda Djons Hopkıns ortalyǵy DDSU jáne Geıts otbasylyq qorymen birlesip uıymdastyrǵan.
«Apatty aýrý juqtyrý» jattyǵýlarynda bolashaq pandemıamen kúres sharalary men oǵan daıyndyq pysyqtaldy.
Sondaı-aq, jarıalanymda Deagel saıtynyń boljamy týraly aıtylady. 2025 jyly planeta halqy azaıady eken. Deagel platformasynda ártúrli elderdiń áýe-ǵarysh kúshteri týraly aqparat bar. Munda osy taqyryptaǵy jańalyqtar shyǵady, saıt eshqandaı boljam jasamaıdy.
Osylaısha, 2025 jyly álemde josparlanǵan ınfeksıa tarap, ashtyq pen jappaı ólim bolatynyna dálel joq.