Ótinimder áleýmettik qyzmetter portaly arqyly rásimdeledi.
Bıyl 10 061 múgedektigi bar adam, onyń ishinde erekshe qajettilikteri bar balalar sanatorlyq-kýrorttyq emdelýden ótti, dep habarlaıdy Almaty-akshamy.kz.
Múgedektigi bar adamdar negizgi aýrýlardyń profılaktıkasy maqsatynda, medısınalyq kórsetilimderdi eskere otyryp, ońaltýdyń jeke baǵdarlamasy negizinde jyl saıyn sanatorlyq-kýrorttyq emdelýden ótedi.
«Ótken jyldan bastap sanatorlyq-kýrorttyq emdelýge ótinimder áleýmettik qyzmetter portaly (http://aleumet.egov.kz) arqyly rásimdeledi. Endi múgedektigi bar adamdar jeke qajettilikterdi, jaǵdaılardy, qoljetimdilikti, saýyqtyrý rásimderiniń kólemderin jáne t. b. eskere otyryp, Portalda tirkelgen, olar úshin yńǵaıly kez kelgen sanatorııdi óz betinshe tańdaý múmkindigine ıe bolady»,- delingen Eńbekmıni baspasóz qyzmetiniń habarlamasynda.
Búgingi kúni óńirlerdiń komısıalary portalǵa 93 sanatorlyq-kýrorttyq uıymdy jiberdi. Olardyń qatarynda «Shýchınskıı» shıpajaıy» AQ (Aqmola oblysy), «Jetisý» shıpajaıy» JSHS (Túrkistan oblysy), «Mıneraldy sý» shıpajaıy» JSHS (Shymkent qalasy), Z. B. Beısekov atyndaǵy «Qazaq soqyrlar qoǵamynyń «Spýtnık» demalys úıi» JSHS (Almaty oblysy), «Sosnovyı bor» shıpajaıy» JSHS (Qostanaı oblysy), «Solnechnyı» balalar sanatorııi» memlekettik emes medısınalyq mekemesi (SQO) jáne basqalary bar.
QR Parlamenti Senaty bastamashylyq etken múgedektigi bar adamdy áleýmettik qorǵaý máseleleri jónindegi jańa zań jobasy aıasynda múgedektigi bar balalardyń ata-analarynyń usynystaryn eskere otyryp, múgedektigi bar bala sanatorıı-kýrorttyq emdelýden ótken kezde oǵan ilesip júrýge arnalǵan shyǵystardy óteý kózdelgen.
Bul túzetýler sanatorlyq-kýrorttyq emdeýmen barynsha kóp balany qamtýǵa múmkindik beredi. Zań jobasyn Májilis eki oqylymda maquldady jáne QR Parlamenti Senatyna qaraýǵa jiberildi.