Ғ. Дәукеев атындағы Алматы энергетика және байланыс университетінде университет ұжымы мен студенттер арасында сараптамалық талқылау өтті. Іс-шараның мақсаты – атом электр станциясының (АЭС) қажеттігі, оның халыққа тиімділігі, экологиялық қауіпсіздігі, мамандарды дайындау ісі, энергия құрылысына қажетті жабдықтар, уран қоры және басқа да тиімді жақтары туралы пікір алмасу болды. Бұл туралы сала мамандары өз ойларын ортаға салды.
Кездесу барысында қатысушылар Қазақстанда АЭС салу туралы өткен референдумның алдын ала қорытындыларын талқылады. Жиналғандардың пікірінше, АЭС салу – Қазақстанның энергетикалық қауіпсіздігін арттырудағы маңызды қадам және елдің экономикалық дамуына серпін береді. Сала мамандарының айтуынша, Қазақстан уран қоры бойынша әлемде алдыңғы орындарда тұр және бұл елімізге атом энергетикасын дамыту үшін үлкен артықшылық береді.
Атом саласының сарапшысы Бауыржан Ибраев АЭС құрылысының елге тигізетін экономикалық және әлеуметтік тиімділіктерін атап өтті:
«Атом электр станциясын салудан қорықпауымыз керек. Әлемде бар тәжірибені еліміз де қолданбақ. АЭС-ның арқасында елдімекендер дамиды, жаңа жұмыс орындары ашылады. Егер АЭС құрылысында 1 инженер жұмыс істесе, оның жанында 10 көмекші қажет болады. Демек, кадр тапшылығы болмайды деп ойлаймын. Энергетика саласында мамандар жеткілікті. Бұл – қауіпсіз жоба, экологиялық тұрғыдан да қауіпсіз. Ешқандай өзен-көлдер құрғатылмайды, сондықтан алаңдауға негіз жоқ. Атом энергетикасы – көмір мен мұнайға қарағанда экологиялық таза энергия көзі, бұл Қазақстанның жасыл экономикаға көшу стратегиясына сай келеді», – деді ол.
Ибраев АЭС салу кезінде технологиялық қауіпсіздік шараларының қатаң сақталатынын, жобадағы қауіпсіздік деңгейінің жоғары екенін де атап өтті.
«Біз әлемдегі ең озық технологияларды қолдану арқылы қауіпсіздікті қамтамасыз етеміз. Бұл жоба арқылы еліміздегі энергетикалық тапшылықты шешіп қана қоймай, көрші елдерге де электр энергиясын экспорттау мүмкіндігі туады. Болашақта бірнеше электр өндіретін орталықтар салу қажеттігі де байқалып отыр, өйткені еліміздің экономикасы мен халқының сұранысы артып келеді», – деді ол.
Кездесу барысында студенттер мен университет ұжымы АЭС құрылысы жөніндегі өз сұрақтарын қойып, саланың жетекші мамандары жауап берді. Сала мамандары Қазақстанда қауіпсіздіктің ең жоғары стандарттары қамтамасыз етілетінін және құрылыс барысында халықаралық тәжірибе мен қатаң нормаларға сүйенетінін түсіндірді.