Екібастұзда кафе ішінде болған жанжалдан кейін бойжеткендердің бірі түзету жұмыстарына жегілді, - деп хабарлайды Aqshamnews.kz тілшісі Polisia.kz-ке сілтеме жасап.
Ішкі істер министрлігінің мәліметінше, мас күйдегі екі қыздың арасында жанжал туындап, соңы төбелеске ұласқан.
"Тексеру барысында келушілердің арасында жанжал шығып, ол өзара ұрып-соғуға ұласқаны анықталды. Қыздар бір-бірінің бетіне алақанмен үш реттен соққы беріп, шаштарынан тартқан. Оқиға өзге келушілердің көзінше болған, төбелесті мекеме қызметкерлері ажыратты", – деп хабарлады полиция.
Сот іс материалдарын қарап, жанжалға қатысушылардың бірін кінәлі деп таныды. Оған 100 айлық есептік көрсеткіш (АЕК) көлемінде түзету жұмыстары түріндегі жаза тағайындалды.