Жапонияның Нагоя қаласында мәнерлеп сырғанаудан жылдың басты жарыстарының бірі – Гран-при финалы өтіп жатыр. Бұл додада маусымның ең үздік алты спортшысы жиналып, жылдың чемпионын анықтайды, деп хабарлайды Аqshamnews.kz тілшісі.
Финалға Қазақстан атынан елдің үздік мәнерлеп сырғанаушысы Михаил Шайдоров қатысып жатыр. Ол өзінің спорттық мансабында екінші рет Гран-при финалына жолдама алған.
Отандасымыз мұзға Италия спортшысы Даниэль Грассльден кейін шыққан. Алайда қысқа бағдарламаны орындау кезінде Шайдоров сәтсіздікке ұшырап, бір рет құлап түсті. Бұдан бөлек тағы бір күрделі элемент барысында өрескел қателік жіберген. Осы олқылықтар оның жүлдеге таласу мүмкіндігін төмендетті.
Қысқа бағдарламаның нәтижелері (ерлер):
-
Юма Кагияма (Жапония) – 108,77
-
Шун Сато (Жапония) – 98,06
-
Илья Малинин (АҚШ) – 94,05
-
Даниэль Грассль (Италия) – 94,00
-
Адам Сяо Хим Фа (Франция) – 78,49
-
Михаил Шайдоров (Қазақстан) – 71,30
Айта кетейік, Михаил Шайдоров – әлем чемпионатының күміс жүлдегері. 2025 жылғы Азия ойындарында қола медаль жеңіп алған, сондай-ақ Төрт құрлық чемпионатында алтын медаль иеленіп, араға 10 жыл салып Денис Теннің тарихи жетістігін қайталаған еді.
Спортшылардың еркін бағдарламасы 6 желтоқсанда өтеді.