Қазақстанның бірінші, әлемнің бесінші ракеткасы Елена Рыбакина ең табысты спортшылардың қатарына енді, - деп хабарлайды Аqshamnews.kz тілшісі.
Sportico журналының дерегіне сүйенсек, Рыбакина 2025 жылы 12,6 млн доллар табыс тауып, ең көп табыс тапқан 15 әйел спортшының ішінде тоғызыншы орынға тұрақтаған.
Рейтингтің көшін екі дүркін «Үлкен дулыға» чемпионы, әлемнің үшінші ракеткасы Корри Гауфф бастап тұр — оның жылдық кірісі 31 млн доллар, соның 23 миллионы демеушілік келісімдерден түскен.
Екінші орында әлемнің бірінші ракеткасы, беларусьтық Арина Сабаленка - 30 млн доллар табыспен. Ал үздік үштікті алты мәрте «Үлкен дулыға» жеңімпазы, әлемнің екінші ракеткасы Ига Свёнтек түйіндеді - оның жылдық табысы 23,1 млн доллар болған.
Айта кетейік, Елена Рыбакина жуырда Эр-Риядте өткен маусымның қорытынды турнирінде тамаша өнер көрсетіп, финалда Арина Сабаленканы айқын басымдықпен жеңді. Осы турнирдің нәтижесінде ол 5,235 млн доллар (шамамен 2,7 млрд теңге) сыйақы иеленді. Бұл - әйелдер теннисі тарихындағы бір турнир үшін берілген ең ірі жүлде.
Бұл жеңіс Рыбакинаның 2022 жылғы Уимблдондағы тарихи триумфынан кейінгі ең үлкен жетістігі.