Қазақстан авиациясы жаңа кезеңге қадам басты
2025 жылғы 9 шілдесінде Алматыдағы Азаматтық авиация академиясында (ААА) ерекше тарихи оқиға болды. Академияға алғаш рет Қазақстанға ресми сапармен келген ИКАО Кеңесінің Президенті Сальваторе Шаккитано келді. Бұл сапар елдің жаһандық әуе көлігі жүйесіндегі маңызын айқындады.
Сапар барысында Сальваторе Шаккитано Академия басшылығымен, профессорлық-оқытушылар құрамымен және студенттерімен кездесті. Ол өз сөзінде Қазақстанның азаматтық авиацияны дамытудағы жетістіктерін жоғары бағалап, заманауи стандарттарды енгізуге, тиімді мемлекеттік саясат жүргізуге және адами капиталға баса көңіл бөлгені үшін алғысын білдірді. Оның айтуынша, авиация — бұл жай ғана ұшу емес, адамдарды, мәдениеттер мен елдерді біріктіретін әлеуметтік-экономикалық дамудың қуатты құралы.
Шаккитано мырза 2050 жылға қарай жолаушылар санының 12 миллиардқа жететінін, көміртекті бейтараптыққа көшу, авиациялық қауіпсіздікті арттыру және гендерлік теңдікке қол жеткізу сияқты маңызды сын-қатерлерді атады. Әйелдердің жаһандық авиациядағы үлесі 5%-дан аспайды, бірақ Қазақстан бұл бағытта оң көрсеткішке ие екені ерекше атап өтті.
Академияда ИКАО ұсынған CBTA (құзыреттілікке негізделген оқыту) моделі енгізілген. Мұнда пилоттар, инженерлер, диспетчерлер мен авиация менеджерлері ұлттық және халықаралық стандарттарға сәйкес даярланады. Академия ИКАО және IATA аккредитациясына ие, сондай-ақ ALICANTO және TRAINAIR PLUS бастамаларына қатысады. Бұдан бөлек шетелдік серіктестермен бірлесіп авторлық курстарды әзірлеуде.
Академия ректоры Бекен Сейдахметов бұл сапарды халықаралық интеграция мен даму жолындағы маңызды кезең деп бағалады. Академия білім беру ұйымы болумен қатар, ИКАО-ның өңірлік серіктесіне айналып, авиациялық білім беру саласындағы жаһандық бастамаларды жүзеге асыруға арналған халықаралық платформа болуға ұмтылады.
Сапар нәтижесінде Қазақстанның азаматтық авиациясын 2050 жылға дейін дамыту жөніндегі мастер-жоспар расталды. Құжатта инфрақұрылымды жаңғырту, цифрлық шешімдерді енгізу, кадр даярлау сапасын арттыру және Қазақстанды Еуропа мен Азия арасындағы транзиттік хаб ретінде нығайту көзделген.
Сондай-ақ, авиациялық білім беру саласында ғылыми-білім беру кластерлерін құру, шетелдік университеттермен бірлескен бағдарламалар мен ағылшын тіліндегі оқыту жүйесін дамыту мәселелері талқыланды.
Азаматтық авиация академиясы азаматтық авиация саласындағы халықаралық ынтымақтастықты дамытуға қосқан елеулі үлесі үшін ИКАО Кеңесінің Президенті Сальваторе Шаккитаноға және ИКАО-ның Еуропа және Солтүстік Атлантика бюросының (EUR/NAT) Өңірлік директоры Николас Раллоға «Азаматтық авиация академиясының Құрметті профессоры» атағын берді.
Бұл сапар — Қазақстан мен ИКАО арасындағы ынтымақтастықтың жаңа кезеңге қадам басқанын білдіреді. Енді екіжақты байланыс тек формалды деңгейде емес, орнықты авиациялық болашаққа бағытталған серіктестік деңгейінде жалғасады.