Алматының Таусамалы шағынауданында инженерлік желілердің құрылысындағы негізгі жұмыстар аяқталды
«Алматы Су» кәсіпорны Наурызбай ауданындағы Таусамалы шағынауданында инженерлік желілердің негізгі құрылыс жұмыстары аяқталғанын хабарлады.
Жоба аясында биыл 6 шақырым су құбыры мен кәріз желілері тартылып, көшелерді асфальттауға дайындық жүргізілді. Мердігер ұйым жол жабынын қалпына келтіруді аяқтап жатыр, жұмыс алдағы күндері толық бітеді.
Жобаны жүзеге асыру қысқа мерзімде жеке сектордағы бірнеше жүз үйді орталықтандырылған су және кәріз жүйесімен қамтамасыз етуге мүмкіндік береді. Бұл тұрғындарға көрсетілетін коммуналдық қызмет сапасын айтарлықтай арттырады.
Жалпы, жыл қорытындысы бойынша «Алматы Су» желісі арқылы 60 шақырымнан астам су және кәріз желілері салынып, қайта жаңғыртылды. Бұл жұмыстар толық аяқталған жердегі нысандар сумен тұрақты түрде жабдықталады. Қалған аумақтарда жолды қалпына келтіру жұмыстары бітуге жақын.