Қаржы мониторингі агенттігінің Павлодар облысы бойынша департаменті жүкті әйелдерді жалған жұмысқа орналастыру арқылы әлеуметтік төлемдерді заңсыз алу схемасын ұйымдастырған тұлғалар тобына қатысты тергеу жүргізіп жатыр., - деп хабарлайды aqshamnews.kz тілшісі.
Тергеу мәліметінше, Зейнетақы төлеу жөніндегі мемлекеттік орталық бөлімінің басшысы өзінің кәсіби білімі мен лауазымдық мүмкіндіктерін пайдалана отырып, жоспарды іске асыру үшін бухгалтер болып істейтін туысын тартқан. Бухгалтер әлеуметтік төлемдермен жұмыс істейтін кәсіпкерлердің бірқатарына қызмет көрсеткен және олардың электрон цифрлық қолтаңбаларына (ЭЦҚ) қолжетімді болған.
Осы ЭЦҚ-ларды иелерінің рұқсатынсыз пайдалана отырып, ол жүкті әйелдерді "жұмысқа қабылдау туралы" жалған бұйрықтар мен еңбек қатынастары заңды рәсімделгендей көрінетін өзге де құжаттарды дайындаған.
Схеманы кеңейту үшін бірнеше таныс адамдар тартылып, олардың міндеті жүкті әйелдерді табу және ұсынылған рәсімдеудің "заңды" екеніне сендіру болған. Жалған деректер негізінде уәкілетті органдар жәрдемақылар тағайындаған, ал алынған қаржы кейін схема қатысушылары арасында бөлініп отырған.
Тексеру қорытындысы бойынша:
-
13 жеке кәсіпкердің атынан
-
50-ден астам жүкті әйелге
-
заңсыз түрде 6 млн теңгеге дейін өсірілген жәрдемақылар төленгені анықталды.
Мемлекетке келтірілген жалпы залал 200 млн теңгеден асты.
Сот санкциясымен күдіктілердің 3 автокөлігіне тыйым салынды. Тергеу жалғасып жатыр.
ҚР ҚПК-нің 201-бабына сәйкес өзге ақпарат жария етілмейді.
