Қостанай облысында "Таза Қазақстан" экологиялық бағдарламасын жүзеге асыруға арналған кеңейтілген жиын өтті. Аталған шарада облыс әкімі Құмар Ақсақалов бұл бастаманың ұлттық сана-сезім мен болашақ ұрпаққа деген қамқорлықтың көрінісі екенін атап өтті. Бұл туралы Aqshamnews.kz сайты хабарлайды.
Аймақ басшысы "Таза Қазақстан" бағдарламасын Мемлекет басшысы Қасым-Жомарт Тоқаевтың өзі ұсынғанын, ал бүгінде ол жалпыұлттық сипатқа ие қуатты инфрақұрылымдық жобаға айналып келе жатқанын айтты. Бағдарлама тек қалалармен шектелмей, шалғай ауылдарды да қамти бастады.
Жиында облыс әкімінің орынбасары Берік Танжариков алғашқы жартыжылдықтағы нәтижелермен бөлісті. Оның айтуынша, 85 мың аула абаттандырылып, 105 көпқабатты үй жөндеуден өтеді. Үш жылда 500-ден астам үй ретке келтірілген. Сонымен қатар, 1030 көше жөнделіп, 17,5 мың көше шамы орнатылады. 123 жаңа балалар және спорт алаңы салынады. Жасыл желек көлемі 105 мың бірліктен асып, заңсыз қоқыс көлемі үш есеге азайған.
Облыстың барлық аудандарында "Жасыл Ел" жастар қозғалысы жұмыс істеп, "Таза аула", "Үздік ауыл" секілді байқаулар өткізіліп келеді. Мәселен, Алтынсарин ауданында 12 ауыл жарықпен қамтылып, саябақтар абаттандырылса, Амангелді ауданында көктем айларында 285 тонна қоқыс шығарылып, 1200 ағаш егілген. Жітіқара ауданында жасанды интеллект арқылы бейнебақылау енгізіліп, күн электр станциялары іске қосылды.
Балалар мен жасөспірімдердің бастамалары да назардан тыс қалмады. Заречное ауылынан 11-сынып оқушысы Ангелина Белослудцева экочеллендждер мен қалдықтарды бөлек жинау бастамасын көтерсе, Узункөл ауданының оқушысы Арсений Бибик "Менің жайлы аулам" байқауының жеңімпазы атанды.
Экологиялық тәртіп пен бақылау бағытында "Эко Патруль" волонтерлік қозғалысы белсенді жұмыс істеп келеді. Олар 100-ден астам нысанды тексеріп, 71 заң бұзушылық анықтаған. Бұл қозғалысқа қолдау ретінде облыс басшылығы материалдық және техникалық көмек көрсететінін мәлімдеді.
Сондай-ақ, бірқатар ауылдар өз аумағын абаттандыруда белсенділік танытып отыр. Сарыкөл ауданының Сорочинка ауылында "Агро-Парасат" компаниясы тек өз нысандарын емес, бүкіл ауылды көркейтіп жатыр. Тобыл қаласында 600-ден астам тәртіп бұзушы әкімшілік жауапкершілікке тартылған.
Жиын соңында облыс әкімі Құмар Ақсақалов орман алқаптарын дамыту, чат-бот жұмысын жандандыру, жастар мен кәсіпкерлерді кеңінен тарту сияқты нақты тапсырмалар берді. Мичурин орман алқабын демалыс орны ретінде дамытуға ерекше назар аударылды.
Құмар Ақсақаловтың айтуынша, шынайы экологиялық мәдениет тек күнделікті тәжірибеге айналғанда ғана қалыптасады.