پرەزيدەنت تۇرمىستىق زورلىق-زومبىلىق ماسەلەسىن شەشۋدى تاپسىردى.
«داعدارىس ورتالىقتارى وداعىنىڭ» باسقارما ءتورايىمى زۋلفيا بايساكوۆا قازاقستان پرەزيدەنتى قاسىم-جومارت توقايەۆتىڭ جولداۋىندا ايتىلعان ماسەلەلەر تۋرالى ءوز پىكىرىن ءبىلدىردى، دەپ حابارلايدى Almaty-akshamy.kz.
بۇگىن ەل پرەزيدەنتى توقايەۆ مىرزا ءوز جولداۋىندا «جاڭا قازاقستاندى» دامىتۋدىڭ باعىت-باعدارىن ناقتى ايقىنداپ بەردى. قىزمەتى ايەلدەر مەن بالالاردىڭ قۇقىقتارىن گەندەرلىك زورلىق-زومبىلىقتىڭ بارلىق تۇرىنەن قورعاۋعا جانە قازاقستانداعى قىلمىس فاكتىسى ءۇشىن قىلمىستىق جازالاۋ نورماسىن ناسيحاتتاۋعا باعىتتالعان داعدارىس ورتالىقتارى وداعىنىڭ باسقارما ءتورايىمى رەتىندە وتباسى-تۇرمىستىق قاتىناستار سالاسى جانە اگرەسسورلارمەن جۇمىستىڭ مىندەتتى پسيحو-الەۋمەتتىك تۇزەتۋ باعدارلاماسىن ۇيىمداستىرىشى رەتىندە ماعان مەملەكەت باسشىسىنىڭ ساياسي رەفورمالار جاريالانعاننان كەيىن بىردەن تۇرمىستىق زورلىق-زومبىلىق ءۇشىن جازانى كۇشەيتۋ تۋرالى تاپسىرما بەرگەنى ۇنادى.
«بۇگىنگى كۇنى ازاماتتار مەن قوعام بەلسەندىلەرى ايەلدەر مەن بالالارعا قاتىستى زورلىق-زومبىلىق ءۇشىن جازانى قاتايتۋ قاجەتتىگى تۋرالى ءجيى ايتا باستادى. باس پروكۋراتۋراعا بۇل ماسەلەنى جان-جاقتى زەرتتەپ، ماسەلەنى شەشۋدى تاپسىرامىن».
قازاقستان تاۋەلسىزدىك العاننان بەرى ايەلدەردى زورلىق-زومبىلىقتان قورعاۋ سالاسىندا ءبىرقاتار رەفورمالارعا قول جەتكىزىلگەنىن اتاپ وتكىم كەلەدى: 2009 جىلى «تۇرمىستىق زورلىق-زومبىلىق پروفيلاكتيكاسى تۋرالى» قازاقستان رەسپۋبليكاسىنىڭ زاڭى قابىلداندى؛ 2016 جىلى ازىرلەنگەن تۇرمىستىق زورلىق-زومبىلىق قۇرباندارىنا ارناۋلى الەۋمەتتىك قىزمەت كورسەتۋ ستاندارتتارى؛ زورلىق-زومبىلىق قۇرباندارىن الەۋمەتتەندىرۋ جانە وڭالتۋ ءۇشىن دامىعان ينفراقۇرىلىم (35-تەن استام داعدارىس ورتالىقتارى، ونىڭ ىشىندە 12 باسپانا)؛ ءاربىر اۋداندا ايەلدەردى زورلىق-زومبىلىقتان قورعاۋ جونىندەگى پوليسيا ينسپەكتورى بار. ءبىراق، سوعان قاراماستان، قىلمىستىڭ بۇل ءتۇرى ءۇشىن جازانى قاتايتىپ، اگرەسسورلاردىڭ ءوز مىنەز-قۇلقى ءۇشىن جاۋاپكەرشىلىگىن قالىپتاستىرۋ قاجەت.
قاسىم-جومارت توقايەۆ ايتقانداي: «مەنى، ەڭ الدىمەن، حالىقتىڭ بولاشاعى قانداي بولاتىنى الاڭداتادى».
«مەملەكەت باسشىسىنىڭ تاپسىرماسى تۇرمىستىق زورلىق-زومبىلىق ماسەلەسىن شەشۋگە ىقپال ەتەتىنىنە سەنىمدىمىن»، - دەپ جازدى زۋلفيا بايساكوۆا.