بۇل جوبا الەۋمەتتىك جاعىنان وسال توپتارداعى، اسىرەسە، اۋىلدىق جەرلەردە تۇراتىن جاستاردى قولداۋ ماقساتىندا ىسكە اسىرىلادى.
ۇكىمەتتىك ەمەس ۇيىمدارعا گرانتتار ۇسىنۋ جونىندە كونكۋرس جاريالاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اقپارات جانە قوعامدىق دامۋ مينيسترلىگىنىڭ تاپسىرىسى بويىنشا ازاماتتىق باستامالاردى قولداۋ ورتالىعى Zhas Project جوباسىن ىسكە اسىرۋ ماقساتىندا قازاقستاندىق ۇەۇ-دان وتىنىمدەردى قابىلداۋدى باستادى. بۇل جوبا الماتى، قاراعاندى، ماڭعىستاۋ، تۇركىستان وبلىستارىندا پيلوتتىق رەجيمدە، ۇكىمەتتىڭ 2022 جىلعا ارنالعان ءىس-قيمىل باعدارلاماسى اياسىندا ىسكە اسىرىلادى»، - دەلىنگەن ۆەدومستۆو سايتىندا.
اتالعان وڭىرلەردىڭ ءارقايسىسىندا بەلگىلى ءبىر جوبانى قارجىلاندىرۋعا 1 ملن تەڭگەنىڭ 63 شاعىن گرانتى بولىنبەك. ماقسات – الەۋمەتتىك وسال توپتارداعى، اسىرەسە، اۋىلدىق جەرلەردە تۇراتىن جاستاردى ءوز ەلدى مەكەندەرىن الەۋمەتتىك-ەكونوميكالىق تۇرعىدا دامىتۋعا، ءونىمدى جۇمىسپەن قامتۋعا تارتۋ، سونداي-اق جاستاردىڭ بيزنەس-يدەيالارىن قولداۋ.
ابقو باسقارما ءتوراعاسىنىڭ ورىنباسارى جاسۇلان بيسەمبييەۆتىڭ ايتۋىنشا، ءبىرىنشى كەزەڭدە بەلگىلى ءبىر وڭىردە جوبانى جۇزەگە اسىراتىن ۇەۇ تاڭدالماق. تاۋەلسىز كونكۋرستىق كوميسسيا ۇەۇ-نىڭ وتىنىمدەرىن قاراۋ كەزىندە الماتى، قاراعاندى، ماڭعىستاۋ، تۇركىستان وبلىستارىندا الەۋمەتتىك جوبالاردى ىسكە اسىرۋ تاجىريبەسىن ەسكەرەتىن بولادى.
ەكىنشى كەزەڭدە گرانتقا يە بولعان ۇەۇ قوعام بەلسەندىلەرىنەن، سالالىق ساراپشىلار مەن كاسىپكەرلەردەن تۇراتىن وڭىرلىك كوميسسيالاردى قۇرادى. ولار ءار جوبانىڭ تيىمدىلىگىن ساراپتاۋمەن اينالىسادى. گرانتتار كونكۋرسىنا ۇەۇ-دان وتىنىمدەردى قابىلداۋ 17 ماۋسىمعا دەيىن جالعاسادى.