الماتىلىق ناۋقاس وڭالتۋ ەم-شارالارىنىڭ ارقاسىندا اياققا تۇردى. دالىرەك ايتساق، زەمبىلمەن جەتكىزىلگەن پاسيەنت اۋرۋحانادان ءوز اياعىمەن شىقتى. ءيا، مەگاپوليستەگى №7 قالالىق كلينيكالىق اۋرۋحانانىڭ نەيرورەابيليتاسيا بولىمشەسىندە ۇزاق ۋاقىت بويى مەديسينالىق وڭالتۋدان وتكەن 67 جاستاعى پاسيەنت ءۇشىن بۇگىن ەرەكشە كۇن.
كلينيكانىڭ باسپا ءسوز قىزمەتى حابارلاعانداي، قۇلاپ اۋىر جاراقات العان زەينەتكەرگە ەكى رەت وتا جاسالعان. بۇعان دەيىن رەابيليتاسيانىڭ ەكى كۋرسىنان ءوتىپتى. وڭالتۋ بولىمىنە جەتكىزىلگەن كەزدە اياق-قولىنان ءال كەتىپ، قولدارى سەمىپ، بۇلشىق ەت ماسساسى 1،0 بالعا دەيىن تومەندەگەن. سالدارىنان قولىن كوتەرە الماي قالعان، ءارى بىرەۋدىڭ سۇيەمەلدەۋىنسىز ءجۇرىپ-تۇرا المايتىن.
اۋرۋحانانىڭ نەيرورەابيليتاسيا بولىمشەسى مەڭگەرۋشىسى اينۇر دوسىبايەۆانىڭ ايتۋىنشا، پاسيەنت وڭالتۋدىڭ 1ء-شى جانە 2ء-شى كۋرستارىنان ءوتىپ، دەنساۋلىقتى قالپىنا كەلتىرۋگە باعىتتالعان ەم-شارالاردى العان. وندا ناۋقاستىڭ دەنساۋلىق جاعدايىنا قاراي دەربەس جانە كەشەندى وڭالتۋ ءىس-شارالارى جۇرگىزىلگەن.
«ءارقايسىسى 14 كۇننەن تۇراتىن ەكى كۋرس بارىسىندا پاسيەنت كۇن سايىن كينەزيوتەراپيەۆپەن جۇمىس ىستەدى، نەيرورەابيليتاسيانىڭ پنف، بوبات تەراپيا سىندى ەڭ زاماناۋي ادىستەرىمەن ەمدەلدى. سونداي-اق، ارنايى قوندىرعىلار ارقىلى جاتتىعىپ، ماسساج، فيزيوەم قابىلدادى، ەڭبەككە بەيىمدەلدى. ناتيجەسىندە كۇندەلىكتى ءومىر سۇرۋگە قاجەتتى داعدىلارى قايتا ورالدى»، – دەيدى رەابيليتولوگ-دارىگەر.
بولىمشەدە مۋلتيديسيپلينارلىق ەمدەۋ ءتاسىلى قولدانىلادى. كوپتەگەن مامانداردىڭ قاتىسۋىمەن جۇرگىزىلەتىن ەم-دوم پاسيەنتتى مۇگەدەكتىكتەن ساقتاپ قالادى جانە ونىڭ قاتارعا قوسىلىپ كەتۋىنە مۇمكىندىك بەرەدى.
«اۋرۋحانادان شىققانعا دەيىن اياق-قولىنداعى بۇلشىق ەتتەرى قاتايىپ، ءوز بەتىمەن ءجۇرىپ تۇراتىن بولدى، قولىن كوتەرەدى، جۇدىرىعىن اشىپ-جۇمادى. ەندى ول رەابيليتاسيانىڭ 3ء-شى كەزەڭىنە جولداندى. ەمدى تىركەلگەن ەمحانا ارقىلى الادى»، – دەيدى اينۇر دوسىبايەۆا.
№7 اۋرۋحانانىڭ نەيرورەابيليتاسيا بولىمشەسى ءۇش جىلدان بەرى جۇمىس ىستەيدى. مۇندا ميداعى قان اينالىمى بۇزىلعان پاسيەنتتەر وڭالتۋدىڭ ەكىنشى كەزەڭىنەن وتەدى جانە مي مەن جۇلىنعا وتا جاسالادى. بۇل جەردە ەمدەلۋ ءۇشىن «اۋرۋحاناعا جاتقىزۋ بيۋروسى» ارقىلى كەزەككە تۇرۋ قاجەت.
ءبىر ايتا كەتەرلىگى، مەديسينالىق ساۋىقتىرۋ مەن قالپىنا كەلتىرۋگە باعىتتالعان ەم-دوم ءمامس ارقىلى جۇرگىزىلەدى. وڭالتۋدان ميداعى قان اينالىمى بۇزىلعان نەمەسە وپەراسيا جاساتقان پاسيەنتتەر العاشقى 6 اي ىشىندە وتە الادى. بيىل بولىمشەدە 560 ناۋقاس ەم قابىلداعان. ونىڭ 70%-ى ينسۋلت العان پاسيەنتتەر بولسا، 30%-ى – ءتۇرلى وپەراسيالاردان كەيىن كەلگەندەر.
– رەابيليتاسيا بولىمىنە كەلگەن كەزدە اۋىر حالدە ەدىم، اياق-قولىمدى قوزعاۋدىڭ ءوزى مۇڭ بولدى. وسىندا العان ەمنىڭ ارقاسىندا اياققا تۇردىم، كۇندە 50 مەترگە دەيىن ءوزىم جۇرەتىن بولدىم. ءوز قولىما ءوزىم يەلىك ەتىپ، جەلكەمدى، مۇرنىمدى قاسىپ، قاسىق، كەسە دەگەندەردى كوتەرەتىن حالگە جەتتىم. جازىلىپ كەلە جاتقانىما كوزىم جەتكەن سوڭ، جىگەرلەنىپ، ۇمىتكە سەنىم قوسىپ، وز-وزىمە كەلە باستادىم. بولىمشە مەڭگەرۋشىسى اينۇر جيەنباي قىزى مەن نۇسقاۋشى-مامان جاناسىل رىسبەكۇلىنا ايتار العىسىم شەكسىز. مەنىڭ اياققا تۇرۋىما وسى كىسىلەردىڭ سىڭىرگەن ەڭبەگى زور. سونىڭ ارقاسىندا ءوزىمدى جاقسى سەزىنىپ، اياق-قولىما جان ءبىتتى. جەتىنشى اۋرۋحانا قىزمەتكەرلەرىنىڭ بارىنە دە ريزامىن، – الماتىلىق 67 جاستاعى تۇرعىن.