الەۋمەتتىك جەلىدە تاريفتەردىڭ وسۋىنە بايلانىستى زەينەتكەرلەرگە ماتەريالدىق كومەك كورسەتىلەدى دەگەن اقپارات تارادى.
ەڭبەك جانە حالىقتى الەۋمەتتىك قورعاۋ مينيسترلىگى جەلىدە تاراعان اقپاراتتىڭ جالعان ەكەنىن مالىمدەدى، دەپ حابارلايدى Almaty-akshamy.kz
"مەسسەندجەرلەر مەن الەۋمەتتىك جەلىلەردە تاراپ جاتقان، ۇكىمەت قاۋلىسىمەن بارلىق زەينەتكەرگە كوممۋنالدىق قىزمەت باعاسىنىڭ وسۋىنە بايلانىستى ماتەريالدىق كومەك كورسەتىلەدى دەگەن اقپارات شىندىققا جاناسپايدى. سەبەبى ۇكىمەت تاراپىنان دوتاسيالىق قارجىلىق كومەك كورسەتۋ تۋرالى قاۋلى قابىلدانعان جوق. سوندىقتان بۇل اقپارات جالعان"، - دەلىنگەن حابارلامادا.
دەگەنمەن ۆەدومستۆو "تۇرعىن ءۇي قاتىناستارى تۋرالى" زاڭ اياسىندا اكىمدىكتەر جەرگىلىكتى بيۋدجەتتەن تۇرمىسى تومەن وتباسىلارعا (ازاماتتارعا) جەكە تۇرعىن ءۇيدى ۇستاۋعا كەتكەن شىعىندار اراسىنداعى ايىرماشىلىقتى وتەۋگە جانە وسى ماقساتتارعا ارنالعان شىعىستاردىڭ شەكتى دەڭگەيىندە تۇرعىن ءۇي كومەگىن كورسەتەتىنىن اتاپ ءوتتى.
تۇرعىن ءۇي كومەگىن الۋعا قۇجاتتاردى egov.kz پورتالى نەمەسە حالىققا قىزمەت كورسەتۋ ورتالىعى ارقىلى بەرۋگە بولادى.