قوستاناي پوليسەيلەرى 13 زەينەتكەردى 40 ملن تەڭگەگە سان سوقتىرعان الاياقتاردى ۇستادى، دەپ حاباراليدى almaty-akshamy.kz
سوڭعى ەكى ايدا قوستاناي وبلىسىنىڭ اۋماعىندا بەلگىسىز ادامداردىڭ قوڭىراۋ شالۋ جولىمەن جاسالعان الاياقتىقتىڭ 13 دەرەگى تىركەلدى. ولار ەگدە جاستاعى جابىرلەنۋشىلەرگە ولاردىڭ جاقىن تۋىستارى جول-كولىك وقيعاسىنا نەمەسە اۋرۋحاناعا تۇسكەنىن حابارلاعان.
ولار وزدەرىن پوليسيا قىزمەتكەرلەرى نەمەسە جابىرلەنۋشىلەردىڭ تۋىستارى رەتىندە تانىستىرىپ، الاياقتاردىڭ ارباۋىنا تۇسكەندەردەن ماسەلەنى شەشۋ ءۇشىن اقشا تالاپ ەتكەن.
جەدەل-ىزدەستىرۋ ءىس-شارالارى شەڭبەرىندە قوستاناي وبلىسى پد كيبەرقىلمىسقا قارسى كۇرەس ءبولىمىنىڭ قىزمەتكەرلەرى قوستاناي پب سولتۇستىك بولىمىمەن بىرلەسىپ، الاياقتىققا كۇدىكتى ادامداردىڭ جەكە باسىن انىقتادى.
– ءبىز كۇدىكتىلەردىڭ جەكە باسىن انىقتادىق. ولاردىڭ اراسىندا كامەلەتكە تولماعاندار دا بولدى. ولار 6 جاس جىگىت. كۇدىكتىلەر وزدەرىنىڭ دەلدالدارىنىڭ نۇسقاۋى بويىنشا ارەكەت ەتتى. قۇقىق قورعاۋ ورگاندارىمەن جول بەرىلگەن جكو نەمەسە مەديسينالىق مەكەمەلەردە ەمدەلگەنى ءۇشىن ماسەلەنى شەشۋ سىلتاۋىمەن جابىرلەنۋشىلەردەن اقشالاي قاراجات الدى. وسىلايشا، الاياقتاردىڭ قولىنان 40 ملن تەڭگەدەن استام شىعىنعا ۇشىراعان 13 زەينەتكەردىڭ زارداپ شەككەنى انىقتالدى، – دەدى قوستاناي وبلىسى پد كيبەرقىلمىسقا قارسى كۇرەس ءبولىمىنىڭ باستىعى ولجاس ماعىپاروۆ.