زارينا بالا كەزىندە گيمناستيكامەن اينالىسقان
تانىمال تەننيسشىمەن كەزدەسۋگە وڭتۇستىك استانانىڭ ءتۇرلى تەننيس ورتالىقتارىنان 50-گە جۋىق بالا كەلدى، دەپ حابارلايدى Almaty-akshamy.kz تەننيس فەدەراسياسىنىڭ Facebook-تەگى پاراقشاسىنا سىلتەمە جاساپ.
كەدەسۋ بارىسىندا زارينا جاس سپورتشىلاردىڭ سۇراقتارىنا جاۋاپ بەردى، اقىلىن ايتتى، سونىمەن قاتار الداعى ماۋسىمداعى جوسپارلارىمەن ءبولىستى. بالالار قازاقستاندىق تەننيس جۇلدىزىنا قىزىقتى سۇراقتار دايىنداپ كەلىپتى.
زارينا بالا كەزىندە گيمناستيكامەن اينالىسقان ەكەن، الايدا تەننيسكە دەگەن قىزىعۋشىلىعى باسىم تۇسكەن. ول ەسىندە جاقسى ساقتالعان ماچتار رەتىندە سەرەنا ۋيليامس جانە ماريا شاراپوۆامەن وتكىزگەن كەزدەسۋلەرىن ايتتى.
سپورتشىنىڭ ايتۋىنشا، الەمنىڭ ءتۇرلى قالالارىندا كوپتەگەن الاڭدا جاتتىققانىنا قاراماستان، ولار الماتىدا جاتتىققانعا جەتپەيدى ەكەن. مانسابىن اياقتاعاننان كەيىن زارينا بالالاردى جاتتىقتىرىپ، ءوزىنىڭ تەننيس اكادەمياسىن قۇرۋدى جوسپارلاپ جۇرگەنىن ايتتى. «قانداي بالمۇزداق ۇناتاسىز؟» - دەگەن سۇراق قويدى تەننيس فەدەراسياسىنىڭ تاربيەلەنۋشىسى كيريلل. بارلىق سۇراقتاردىڭ ىشىندە زارينا وسى سۇراقتى ۇناتتى. زارينا كارامەل بالمۇزداقتى ۇناتاتىن بولىپ شىقتى. بۇل سۇراعى ءۇشىن كيريلل سپورتشىنىڭ قولتاڭباسى بار فۋتبولكانى سىيلىققا الدى.
تەننيس فەدەراسياسىنىڭ الماتىداعى فيليالىنىڭ وكىلى دە سپورتشىعا سۇراق قويدى.
- ماۋسىم قالاي ءوتتى؟ جوسپارلاعان نارسەلەر ورىندالدى ما؟
- ارينە، بۇل ۇزاق ماۋسىم بولدى. جاراقاتتار بولدى. الايدا ءقازىر قالپىما كەلىپ جاتىرمىن، كەلەسى ماۋسىمعا تولىق دايىندىقپەن كەلەمىن دەگەن ۇمىتتەمىن.
- بيىل ءبىرىنشى رەت وليمپياداعا قاتىستىڭىز. قانداي سەزىمدە بولدىعىز؟
- ءسوز ايتىپ جەتكىزە المايمىن. وليمپياداداعى اتموسفەرا عاجاپ، ەشتەڭەمەن سالىستىرۋعا كەلمەيدى. الەمنىڭ ەڭ مىقتى سپورتشىلارى جارىسقا قاتىسۋ ءۇشىن جينالادى. وكىنىشكە وراي، جاراقاتتاردىڭ كەسىرىنەن ويلاعانىمدى كورسەتە المادىم، الايدا پاريجدە وتەتىن كەلەسى ويىندارعا قاتىسامىن دەگەن ۇمىتتەمىن، - دەدى زارينا.