توپان سۋ استىندا قالعان وڭىرلەردە حالىققا مەديسينالىق كومەك كورسەتىلۋدە دەپ ءمالىم ەتتى دەنساۋلىق ساقتاۋ مينيسترلىگىنىڭ رەسمي وكىلى ايگەرىم ۋرازالييەۆا، دەپ حابارلايدى اlmaty-akshamy.kz.
«سۋ تاسقىنى كەزەڭىندە پسيحولوگيالىق كومەك كورسەتۋ ۇيىمداستىرىلدى. وسى ماقساتتا جەدەل شتاب قۇرىلىپ، وندا 30 پسيحولوگ تۇرعىندارعا كومەگىن بەرىپ جاتىر» - دەدى ايگەرىم ۋرازالييەۆا ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
مينيسترلىك وكىلىنىڭ ايتۋىنشا، جۇكتى ايەلدەر مەن بالالاردىڭ جاعدايى دا ەرەكشە نازاردا.
«وتكەن تاۋلىكتە اتىراۋ وبلىسىندا قۇلسارى قالاسىنان پەرزەنتحانادان 12 ايەل، ونىڭ ىشىندە 8 پەرزەنتحانا مەن 5 جۇكتى ايەل تولىق مەرزىمدە مەديسينالىق ۇيىمدارعا ەۆاكۋاسيالاندى. 39-40 اپتا مەرزىمىندەگى جۇكتى ايەلدەردىڭ ءبىرى جەدەل مەديسينالىق جاردەم كولىگىندە تاسىمالداۋ كەزىندە بوسانعان. سالماعى 3610 گ، بويى 55 سم قىز دۇنيەگە كەلدى. قازىرگى ۋاقىتتا بوسانعان ايەل مەن بالا بەينەۋ اۋداندىق اۋرۋحاناسىندا، ولاردىڭ جاعدايى قاناعاتتانارلىق»، - دەيدى ول.
دەنساۋلىق ساقتاۋ مينيسترلىگىنىڭ مالىمەتىنشە، سۋ تاسقىنى باستالعاننان بەرى بارلىعى 84 جۇكتى ايەل ەۆاكۋاسيالاندى. ونىڭ ىشىندە بوسانۋ مەرزىمى جاقىن 31 ايەل اۋرۋحاناعا جاتقىزىلدى.