زارداپ شەككەن الماتىلىق كاسىپكەرلەر اسحات ورالوۆپەن كەزدەستى

كاسىپكەرلىكتى دامىتۋ مەن قولداۋ ماسەلەلەرى AMANAT پارتياسىنىڭ باسىمدىعى بولىپ قالا بەرەدى.

AMANAT پارتياسىنىڭ اتقارۋشى حاتشىسى اسحات ورالوۆ الماتىعا جۇمىس ساپارىنىڭ ەكىنشى كۇنى قاڭتار ايىنداعى وقيعالار كەزىندە زارداپ شەككەن شاعىن جانە ورتا بيزنەس وكىلدەرىمەن كەزدەستى. سونىمەن قاتار پارتيانىڭ جاستار قاناتىنىڭ بەلسەندىلەرىمەن الداعى جۇمىس باعىتتارىن تالقىلادى، دەپ حابارلايدى Almaty-akshamy.kz.

كەزدەسۋ بارىسىندا الماتىلىق كاسىپكەرلەر اسحات ورالوۆقا نىسانداردى قالپىنا كەلتىرۋ جاعدايى جانە قازىرگى تاڭدا ورىن الىپ وتىرعان ءتۇيىندى ماسەلەلەر تۋرالى ايتتى.

«پارتيا ءتوراعاسى، پرەزيدەنت قاسىم-جومارت توقايەۆتىڭ تاپسىرماسى بويىنشا نىسانداردى قالپىنا كەلتىرۋ جانە زارداپ شەككەن كاسىپكەرلەرگە كەلتىرىلگەن زالالدى وتەۋ بويىنشا شارالار قابىلدانۋدا. جەرگىلىكتى بيلىكتىڭ مالىمەتى بويىنشا، الماتىدا 1 مىڭنان استام كاسىپكەر 3،7 ملرد تەڭگە سوماسىندا تولەم الدى. ولاردىڭ ىشىندە ساۋدا، قوعامدىق تاماقتانۋ، لوگيستيكا، ب ا ق جانە باسقا دا سالالاردىڭ سۋبەكتىلەرى بار. 10 ناۋرىزعا دەيىن تاعى 200-دەن استام ءوتىنىشتى قاراۋ جوسپارلانۋدا، وسىلايشا وتىنىشتەردىڭ 90% قاناعاتتاندىرىلادى»، - دەدى اسحات ورالوۆ كەزدەسۋ قورىتىندىسىندا.

ونىڭ ايتۋىنشا، قازىرگى تاڭدا ەلىمىزدە حالىقتىڭ 40% جۋىعىنا جۇمىس بەرىپ وتىرعان 1،4 ميلليوننان استام كاسىپكەر بار. الماتى قالاسىنىڭ وزىندە 200 مىڭنان استام شوب سۋبەكتىسى جۇمىس ىستەيدى. سوندىقتان كاسىپكەرلىكتى دامىتۋ مەن قولداۋ ماسەلەلەرى ءارقاشان AMANAT پارتياسىنىڭ باسىم باعىتى بولىپ قالا بەرەدى.

وسى كۇنى اسحات ورالوۆ پارتيا جاستار قاناتىنىڭ بەلسەندىلەرىمەن دە كەزدەستى.

«پارتيانى ترانسفورماسيالاۋ ءجۇرىپ جاتقان كەزەڭىندە Jas Otan جەرگىلىكتى جەرلەردەگى جاستاردىڭ پروبلەمالارىن شەشۋگە باعىتالعان جۇمىستى بۇرىنعىدان دا كۇشەيتىپ، ونى كۇن تارتىبىنەن تۇسىرمەۋى ءتيىس. قازىرگى ۋاقىتتا پارتيا جاستاردىڭ، ونىڭ ىشىندە NEET ساناتىنداعى جاس بۋىننىڭ ءتۇيىندى ماسەلەلەرىن انىقتاۋ بويىنشا كەشەندى تالداۋ جۇرگىزۋدە. وسى جۇمىستىڭ قورىتىندىسى بويىنشا جاڭا جاستار باعدارلاماسى ازىرلەنىپ، ول Jas Otan فورۋمىندا قابىلدانادى»، - دەپ تۇيىندەدى اسحات ورالوۆ.