الماتى قالاسىنىڭ ورتالىعىندا ورنالاسقان زاڭسىز ساۋدا پاۆيلوندارى بۇزىلادى، دەپ حابارلايدى Almaty-akshamy.kz
الماتى قالاسى قالا قۇرىلىسىن باقىلاۋ باسقارماسىنىڭ اقپاراتى بويىنشا، دوستىق داڭعىلى 170/1 مەكەنجايى بويىنشا ۋچاسكەدەگى ساۋدا نىساندارى زاڭسىز سالىنعان. وسى ساۋدا پاۆيلوندارىن بۇزۋ تۋرالى شەشىمدى سوت اعىمداعى جىلدىڭ 2 مامىرىندا شىعاردى جانە سوت شەشىمىن ورىنداۋ ءۇشىن دۇڭگىرشەكتەردى بولشەكتەۋ جۇمىستارى باستالدى.
سول ۋچاسكەدە ورنالاسقان عيماراتتى بۇزۋ بويىنشا سوت پروسەستەرى دە اياقتالدى.
بۇعان دەيىن باسقارما مەنشىك يەسىنە قاتىستى 2022 جىلعى 28 قازاندا مەدەۋ اۋداندىق سوتىنا بۇزۋ تۋرالى تالاپ ارىز بەرگەن بولاتىن. اعىمداعى جىلدىڭ 9 ماۋسىمدا سوت شەشىمىمەن بۇزۋ تالابى قاناعاتتاندىرىلدى. 2023 جىلعى 29 تامىزدا الماتى قالالىق سوتىنىڭ قاۋلىسىمەن مەدەۋ اۋداندىق سوتىنىڭ شەشىمى وزگەرىسسىز قالدى.
قازىرگى تاڭدا اتقارۋ پاراعى ادىلەت دەپارتامەنتىندە ورىنداۋدا.